నీట్ పేపర్ లీక్: కంగనా రనౌత్ vs సౌరవ్ దాస్ మాటల యుద్ధం

నీట్ పేపర్ లీక్ వ్యవహారంలో జెన్-జీ నిరసనకారులపై వివాదాస్పద వ్యాఖ్యలు చేసిన నటి, భాజపా ఎంపీ కంగనా రనౌత్, కాక్రోచ్ జనతా పార్టీ (CJP) అధికార ప్రతినిధి సౌరవ్ దాస్‌పై తీవ్ర విమర్శలు గుప్పించారు. అతడి వయసులో తాను రెండు జాతీయ అవార్డులు సాధించానని ఆమె తెలిపారు.

నీట్ పేపర్ లీక్ వ్యవహారంలో జెన్-జీ నిరసనకారులపై వివాదాస్పద వ్యాఖ్యలు చేసిన నటి, భాజపా ఎంపీ కంగనా రనౌత్ మరోసారి వార్తల్లో నిలిచారు. కాక్రోచ్ జనతా పార్టీ (CJP) అధికార ప్రతినిధి సౌరవ్ దాస్‌పై ఆమె తీవ్ర స్థాయిలో విమర్శలు గుప్పించారు. అతడో పనికిరాని వ్యక్తి అని మండిపడ్డారు. అతడి వయసులో తాను రెండు జాతీయ అవార్డులు సాధించానని తెలిపారు.

జెన్-జీ నిరసనకారులు గట్టర్ జనరేషన్ (మురికి కాలువ లాంటివారు) అంటూ కంగనా రనౌత్ చేసిన వ్యాఖ్యలకు సౌరవ్ దాస్ స్పందించారు. “ఆమె వ్యాఖ్యలను సొంత పార్టీ వారే సీరియస్ గా తీసుకోరు. మేమెందుకు బాధపడాలి. ఆమె చెప్పే మాటలను జెన్-జీ, జెన్-ఆల్ఫా లాంటి యువ తరం పట్టించుకుంటుందని నేను అనుకోను. ఈ దేశానికి కంగన చేసిన దానికంటే.. యువతరమే ఎక్కువ చేసింది. హిమాచల్ ఎంపీగా తన నియోజకవర్గానికి వెళ్లిన ఆమె.. చిన్న పనికే ఇబ్బంది పడ్డారు. తాను చేయలేనని చెప్పారు. ఆమె ఎంత సీరియస్గా ఉంటారో దీన్ని బట్టే అర్థం చేసుకోవచ్చు” అని విమర్శించారు. దీంతో సీజేపీ ప్రతినిధికి కంగన ఘాటుగా బదులిచ్చారు.

“ఈ వ్యక్తి (సౌరవ్ దాస్) కోసం నెట్టింట వెతికాను. 28 ఏళ్ల విద్యార్థి అని వచ్చింది. కానీ నాకు నమ్మకం లేదు. అవును.. నేను గత రెండేళ్లుగానే రాజకీయాల్లో ఉండొచ్చు.. కానీ 20 ఏళ్లుగా ప్రజాజీవితంలో కొనసాగుతున్నా. అతడి వయసులో నేను రెండు జాతీయ అవార్డులు సాధించా. నిజమే పార్లమెంట్ సభ్యురాలిగా నాకు పనిభారం ఎక్కువగా ఉందని అన్నాను. ఎందుకంటే నేను ఎంపీ మాత్రమే కాదు.. దర్శకురాలు, నటి, నిర్మాత, స్క్రీన్ రైటర్, వ్యాపారవేత్తగా ఎన్నో విధులు నిర్వర్తిస్తున్నా. కానీ, పనికిరాని, నిరుద్యోగి అయిన నీలాంటి వ్యక్తికి... ఏ వయసులోనైనా బిజీగా ఉండటం అనేది ఎప్పటికీ అర్థం కాదు. సౌరవ్.. నీది వ్యక్తిగత సమస్యే. నువ్వు విద్యార్థివి కాదు. ఇకనైనా కొన్ని నైపుణ్యాలు నేర్చుకో" అని కంగనా రనౌత్ మండిపడ్డారు.