మాజీ మంత్రి జీవన్ రెడ్డి బీఆర్ఎస్ లోకి? కేటీఆర్ తో కీలక భేటీ

జగిత్యాల జిల్లాకు చెందిన కాంగ్రెస్ సీనియర్ నాయకుడు, మాజీ మంత్రి జీవన్ రెడ్డి బీఆర్ఎస్ పార్టీలో చేరేందుకు రంగం సిద్ధం చేసుకుంటున్నట్లు రాజకీయ వర్గాల్లో జోరుగా ప్రచారం జరుగుతోంది. ఈ పరిణామంపై మరింత స్పష్టత వచ్చేందుకు, బీఆర్ఎస్ వర్కింగ్ ప్రెసిడెంట్ కేటీఆర్ ఈరోజు (ఏప్రిల్ 09) జీవన్ రెడ్డితో సమావేశం కానున్నారు.

కేటీఆర్, పార్టీ ముఖ్య నేతలతో కలిసి గురువారం మధ్యాహ్నం జగిత్యాలలోని జీవన్ రెడ్డి నివాసానికి వెళ్లనున్నారు. ఈ భేటీకి ముందు నుంచే ఇరు పక్షాల మధ్య చర్చలు జరుగుతున్నాయని సమాచారం. కేటీఆర్ నిన్ననే ఫోన్ ద్వారా జీవన్ రెడ్డిని సంప్రదించి, బీఆర్ఎస్ పార్టీలో చేరాలని ఆహ్వానించినట్లు తెలుస్తోంది.

బీఆర్ఎస్ పార్టీలో జీవన్ రెడ్డిని కీలక నాయకుడిగా చేర్చుకోవాలని అధిష్ఠానం యోచిస్తున్నట్లు సమాచారం. గతంలో సీనియర్ నాయకుడు కే. కేశవరావుకు ఇచ్చిన సెక్రటరీ జనరల్ పదవిని జీవన్ రెడ్డికి ఇవ్వాలనే ఆలోచనలో పార్టీ ఉన్నట్లు విశ్వసనీయ వర్గాలు చెబుతున్నాయి. ఆయన పార్టీ ప్రవేశానికి సంబంధించిన తేదీపై కూడా చర్చలు జరుగుతున్నట్లు తెలిసింది.

ఈ నెల 13న లేదా ఏప్రిల్ 27న జరిగే పార్టీ ఆవిర్భావ దినోత్సవం సందర్భంగా జీవన్ రెడ్డి బీఆర్ఎస్ కండువా కప్పుకునే అవకాశాలు ఉన్నాయని సమాచారం. నేడు జరగనున్న కేటీఆర్-జీవన్ రెడ్డి భేటీ అనంతరం, ఆయన పార్టీలో చేరే అంశంపై స్పష్టత వచ్చే అవకాశం ఉంది. ఈ పరిణామం తెలంగాణ రాజకీయాల్లో కీలక మార్పులకు దారితీయవచ్చని రాజకీయ విశ్లేషకులు భావిస్తున్నారు.