కర్ణాటకలో విద్యార్థులకు తప్పనిసరి హెచ్‌ఐవీ పరీక్షలు, కౌన్సెలింగ్

రాష్ట్రంలోని అన్ని ప్రభుత్వ, ఎయిడెడ్, ప్రైవేట్ కళాశాలల్లో విద్యార్థులకు హెచ్‌ఐవీ పరీక్షలు, కౌన్సెలింగ్‌ను తప్పనిసరి చేస్తూ కర్ణాటక ప్రభుత్వం ఉత్తర్వులు జారీ చేసింది. యువతలో వేగంగా విస్తరిస్తున్న హెచ్‌ఐవీ వ్యాప్తిని అరికట్టడం, విద్యార్థుల్లో అవగాహన పెంపొందించడం దీని లక్ష్యం.

రాష్ట్రంలోని అన్ని ప్రభుత్వ, ఎయిడెడ్, మరియు ప్రైవేట్ కళాశాలల్లో విద్యార్థులకు హెచ్‌ఐవీ (HIV) పరీక్షలు మరియు కౌన్సెలింగ్‌ను తప్పనిసరి చేస్తూ కర్ణాటక ప్రభుత్వం కీలక, సంచలనాత్మక ఉత్తర్వులు జారీ చేసింది. యువతలో వేగంగా విస్తరిస్తున్న హెచ్‌ఐవీ వ్యాప్తిని అరికట్టడం, విద్యార్థుల్లో ముందస్తు అవగాహన పెంపొందించడమే ఈ నిర్ణయం లక్ష్యం.

జాతీయ ఎయిడ్స్ నియంత్రణ సంస్థ (NACO) నివేదిక ప్రకారం, కర్ణాటకలో ప్రస్తుతం సుమారు 2.60 లక్షల మంది హెచ్‌ఐవీ బాధితులు ఉన్నారు. వీరిలో 54,000 మందికి వైరస్ సోకిన విషయం తెలియకపోవడం ఆందోళన కలిగిస్తోంది. ముఖ్యంగా 18-35 ఏళ్ల యువతలో ఈ వ్యాధి వేగంగా విస్తరిస్తున్నట్లు అధికారులు గుర్తించారు.

ఇటీవల నిర్వహించిన పరీక్షల్లో 18-25 ఏళ్ల వయస్సు గల 7,000 మందికి పైగా విద్యార్థులకు హెచ్‌ఐవీ పాజిటివ్‌గా నిర్ధారణ కావడం ఆరోగ్య వర్గాలను దిగ్భ్రాంతికి గురిచేసింది. కళాశాల దశలోనే విద్యార్థులు ఈ ఆరోగ్య ప్రమాదాల బారిన పడుతుండటంతో, ఉన్నత విద్యాసంస్థలను వేదికగా చేసుకుని నివారణ చర్యలు చేపట్టాలని ప్రభుత్వం భావించింది.

ఈ నేపథ్యంలో రాష్ట్రంలోని విశ్వవిద్యాలయాలు, డిగ్రీ, ఇంజనీరింగ్, మరియు వృత్తి విద్యా కళాశాలల్లో ఆరోగ్య పరీక్షలతో పాటు నిపుణులతో కౌన్సెలింగ్ సెషన్లను క్రమం తప్పకుండా నిర్వహించనున్నారు. వ్యాధి లక్షణాలు, వ్యాప్తి చెందే మార్గాలు, తీసుకోవాల్సిన జాగ్రత్తలపై అవగాహన కల్పించడం ద్వారా హెచ్‌ఐవీకి అడ్డుకట్ట వేయవచ్చని అధికారులు భావిస్తున్నారు. ఈ చర్య వ్యాధి ముందస్తు గుర్తింపునకు, బాధితులకు సకాలంలో చికిత్స అందించడానికి ఎంతగానో దోహదపడుతుందని నిపుణులు అభిప్రాయపడుతున్నారు.