నిర్మల్, జూలై 8
జిల్లాలో ఇందిరమ్మ ఇండ్ల నిర్మాణాలను వేగంగా పూర్తి చేసి, అర్హులైన ప్రతి పేద కుటుంబానికి గృహం అందేలా చర్యలు చేపట్టాలని జిల్లా కలెక్టర్ భవేశ్ మిశ్రా ఆదేశించారు. బుధవారం కలెక్టరేట్ సమావేశ మందిరంలో జరిగిన సమీక్షలో ఆయన పలు కీలక సూచనలు చేశారు.
జిల్లాలో ఇందిరమ్మ ఇండ్ల నిర్మాణాలను వేగంగా పూర్తి చేసి, అర్హులైన ప్రతి పేద కుటుంబానికి గృహం అందేలా అధికారులు చర్యలు చేపట్టాలని జిల్లా కలెక్టర్ భవేశ్ మిశ్రా ఆదేశించారు.
బుధవారం కలెక్టరేట్ సమావేశ మందిరంలో ఇందిరమ్మ ఇండ్ల నిర్మాణాలు, ఘన వ్యర్థాల నిర్వహణ, గ్రామీణాభివృద్ధి సంస్థ (డీఆర్డీఓ), జిల్లా పంచాయతీ శాఖల పనితీరుపై నిర్వహించిన సమీక్ష సమావేశంలో ఆయన అధికారులకు పలు కీలక సూచనలు చేశారు.
గుడిసెల్లో నివసిస్తున్న అర్హులైన పేదలకు రెండో దశలో ఇందిరమ్మ ఇండ్లను పారదర్శకంగా మంజూరు చేయాలని, మండలాల వారీగా గృహ నిర్మాణ పురోగతిని ఎప్పటికప్పుడు సమీక్షించాలని సూచించారు. ఆర్థిక ఇబ్బందులు ఎదుర్కొంటున్న లబ్ధిదారులకు మహిళా సంఘాల ద్వారా రుణాలు అందించి ఇళ్ల నిర్మాణం నిలిచిపోకుండా చర్యలు తీసుకోవాలని ఆదేశించారు.
గ్రామీణ, పట్టణ ప్రాంతాల్లో ఘన వ్యర్థాల నిర్వహణను సమర్థవంతంగా అమలు చేయడంతో పాటు ప్రతి ఇంటి నుంచి ప్రతిరోజూ చెత్త సేకరణ చేపట్టాలని సూచించారు. చెత్తను శాస్త్రీయంగా నిర్వహించి సేంద్రియ ఎరువుల తయారీతో పాటు ఇతర ఆదాయ వనరులను అభివృద్ధి చేయాలని తెలిపారు.
పారిశుధ్య నిర్వహణను మెరుగుపరుస్తూ స్టీల్ బ్యాంకుల వినియోగాన్ని ప్రోత్సహించాలని, 120 మైక్రాన్ల కంటే తక్కువ మందం ఉన్న ప్లాస్టిక్ వస్తువుల వినియోగంపై నిషేధాన్ని కఠినంగా అమలు చేయాలని ఆదేశించారు. నిబంధనలు ఉల్లంఘించిన వారిపై చట్టపరమైన చర్యలు తీసుకోవాలని స్పష్టం చేశారు.
ప్రతి వారం రెండు రోజుల పాటు డ్రై డే కార్యక్రమాలు నిర్వహించి, దోమల నివారణకు ఫాగింగ్, స్ప్రేయింగ్ చేపట్టాలని సూచించారు. ప్రజలకు సురక్షితమైన తాగునీరు అందించేందుకు నీటి ట్యాంకులను క్రమం తప్పకుండా శుభ్రపరచి క్లోరినేషన్ నిర్వహించాలని తెలిపారు.
వన మహోత్సవ కార్యక్రమాన్ని విజయవంతంగా నిర్వహించి విస్తృత స్థాయిలో మొక్కలు నాటాలని, ఫామ్ పాండ్ల నిర్మాణ లక్ష్యాలను కూడా సకాలంలో పూర్తి చేయాలని అధికారులను ఆదేశించారు.
సమావేశంలో స్థానిక సంస్థల అదనపు కలెక్టర్ బి. వెంకటేశ్వర్లు, డీఆర్డీఓ విజయలక్ష్మి, డీపీవో శ్రీనివాస్, హౌసింగ్ పీడీ శ్రీనివాస్, సంబంధిత శాఖల అధికారులు పాల్గొన్నారు.
