మిర్యాలగూడ పట్టణంలో దశాబ్దాలుగా ప్రజలు ఎదుర్కొంటున్న ట్రాఫిక్ సమస్యలకు శాశ్వత పరిష్కారం చూపాలని ఎమ్మెల్యే బత్తుల లక్ష్మారెడ్డి (బిఎల్ఆర్) ప్రయత్నాలు ముమ్మరం చేశారు. ఈ దిశగా, శనివారం రాత్రి సాగర్ రోడ్డుపై నూతనంగా నిర్మిస్తున్న డివైడర్ల పనులను ఆయన క్షేత్రస్థాయిలో పరిశీలించారు.
ఎమ్మెల్యే బత్తుల లక్ష్మారెడ్డి, స్థానిక వన్ టౌన్, టూ టౌన్ సీఐలు, ట్రాఫిక్ పోలీసు అధికారులతో కలిసి రహదారి పరిస్థితులను పర్యవేక్షించారు. గత నాలుగు రోజులుగా మారుతున్న ట్రాఫిక్ తీరు, కొత్త డివైడర్ల వల్ల కలుగుతున్న మార్పులను అధికారులతో కలిసి ఆయన విశ్లేషించారు.
పట్టణంలో ట్రాఫిక్ క్రమబద్ధీకరణకు అదనపు సిబ్బంది అవసరమని గుర్తించిన ఎమ్మెల్యే, వెంటనే జిల్లా ఎస్పీతో ఫోన్లో మాట్లాడి, మిర్యాలగూడకు అవసరమైన అదనపు పోలీస్ సిబ్బందిని వెంటనే కేటాయించాలని కోరారు. కేవలం జరిమానాలు విధించడం కాకుండా, ప్రజలకు ట్రాఫిక్ నిబంధనలపై అవగాహన కల్పించాలని అధికారులకు సూచించారు.
కొత్త నిబంధనల వల్ల వాహనదారులకు ఇబ్బందులు కలగకుండా చూడాలని, నో-పార్కింగ్ జోన్లలో వాహనాలు నిలపకుండా చూడాలని ఎమ్మెల్యే సూచించారు. వ్యాపారస్తులు నిర్దేశిత పార్కింగ్ స్థలాలను ఏర్పాటు చేయాలని, పోలీసులు ప్రజలతో స్నేహపూర్వకంగా వ్యవహరిస్తూనే నిబంధనలను అమలు చేయాలని కోరారు.
పర్యవేక్షణ అనంతరం ఎమ్మెల్యే మాట్లాడుతూ, మిర్యాలగూడ పట్టణ అభివృద్ధి, ప్రజల క్షేమమే తమ మొదటి ప్రాధాన్యత అని, ట్రాఫిక్ రద్దీని తగ్గించి, సురక్షితమైన ప్రయాణాన్ని అందించేందుకు ప్రభుత్వం కట్టుబడి ఉందని తెలిపారు. ప్రజలు నిబంధనలను పాటించి అధికారులకు సహకరించాలని కోరారు. భవిష్యత్తులో ఈ చర్యలు పట్టణ రూపురేఖలను మారుస్తాయని స్థానికులు ఆశాభావం వ్యక్తం చేస్తున్నారు.
