లోకేశ్వరం, 6 September
నిర్మల్ జిల్లా మండలంలో పారిశుధ్య నిర్వహణ అస్తవ్యస్తంగా మారిందని, దీనిపై కాంగ్రెస్ ప్రభుత్వం నిర్లక్ష్యంగా వ్యవహరిస్తోందని బీఆర్ఎస్ నాయకులు తీవ్రంగా విమర్శించారు. పారిశుధ్య కార్మికులకు జీతాలు, ఆటో డ్రైవర్లకు హామీల అమలులో ప్రభుత్వం విఫలమైందని ఆరోపించారు.
పల్లెల్లో పారిశుధ్యం గాలికొదిలేశారు: బిఆర్ఎస్ నేతల తీవ్ర ఆగ్రహం (నిర్మల్ జిల్లా): గ్రామాల్లో పారిశుధ్య నిర్వహణ పూర్తిగా అస్తవ్యస్తంగా తయారైనా కాంగ్రెస్ ప్రభుత్వం పట్టించుకోవడం లేదని బిఆర్ఎస్ (BRS) నాయకులు తీవ్రస్థాయిలో ధ్వజమెత్తారు. మండలంలోని పలు గ్రామాల్లో బిఆర్ఎస్ ఆధ్వర్యంలో పారిశుధ్య సమస్యలపై గురువారం నిరసన కార్యక్రమాలు చేపట్టారు. ఈ సందర్భంగా బిఆర్ఎస్ నియోజకవర్గ సమన్వయ సభ్యుడు లోలం శ్యాంసుందర్ మాట్లాడుతూ.. గ్రామాల్లో పారిశుధ్యం అధ్వానంగా మారినా ప్రభుత్వం నిర్లక్ష్యంగా వ్యవహరిస్తోందని విమర్శించారు. పారిశుధ్య కార్మికులకు గత 18 నెలలుగా జీతాలు చెల్లించకపోవడం దారుణమని ఆరోపించారు. అలాగే, ఆటో డ్రైవర్లకు ఏటా రూ.12 వేలు ఇస్తామని ఎన్నికల సమయంలో ఇచ్చిన హామీని కాంగ్రెస్ ప్రభుత్వం ఇప్పటివరకు అమలు చేయలేదని, ప్రజలను, కార్మికులను మోసం చేస్తోందని మండిపడ్డారు. ఇప్పటికైనా పారిశుధ్య కార్మికుల వేతనాలు తక్షణమే విడుదల చేయాలని, గ్రామాల్లో శుభ్రత లోపించకుండా చర్యలు తీసుకోవాలని వారు డిమాండ్ చేశారు.
