కరీంనగర్ పట్టణంలో మరో విషాద ఘటన చోటుచేసుకుంది. టూ టౌన్ పోలీస్ స్టేషన్లో పనిచేస్తున్న ఎస్ఐ చంద్రశేఖర్ ఆత్మహత్యకు పాల్పడ్డారు. ఐదు రోజుల క్రితం ఆయన భార్య దివ్య కూడా ఆత్మహత్య చేసుకోవడంతో, ఈ రెండు ఘటనలు స్థానికంగా తీవ్ర కలకలం రేపుతున్నాయి.
వివరాల్లోకి వెళితే, కరీంనగర్ టూ టౌన్ పోలీస్ స్టేషన్ పరిధిలోని ఎస్ఐ చంద్రశేఖర్ తన అత్తగారింట్లో ఉరివేసుకుని ఆత్మహత్య చేసుకున్నట్లు సమాచారం. ఈ ఘటనపై పోలీసులు కేసు నమోదు చేసుకుని దర్యాప్తు ప్రారంభించారు.
గత వారం రోజులుగా ఎస్ఐ చంద్రశేఖర్ తీవ్ర మానసిక ఒత్తిడితో ఉన్నట్లు ఆయన సన్నిహితులు తెలిపారు. ఐదు రోజుల క్రితం ఆయన భార్య దివ్య కూడా ఆత్మహత్య చేసుకోవడం, ఆ బాధను తట్టుకోలేక చంద్రశేఖర్ ఈ నిర్ణయం తీసుకున్నారని ప్రాథమికంగా అంచనా వేస్తున్నారు.
దంపతులు ఇద్దరూ ఒకేసారి మరణించడంతో, వారిద్దరి సంతానం అనాథలుగా మారడం అందరినీ తీవ్రంగా కలచివేస్తోంది. ఈ ఘటనపై పూర్తిస్థాయి విచారణ జరుపుతున్నామని, ఆత్మహత్యకు గల కారణాలపై ఆరా తీస్తున్నామని పోలీసులు తెలిపారు.
పోలీసులు సంఘటనా స్థలాన్ని పరిశీలించి, ఆధారాలు సేకరించారు. పోస్టుమార్టం అనంతరం మృతదేహాన్ని కుటుంబ సభ్యులకు అప్పగించనున్నట్లు తెలిపారు. ఈ ఘటనకు సంబంధించి మరిన్ని వివరాలు తెలియాల్సి ఉంది.
