అక్షరాలు కేవలం పదాల కూర్పు మాత్రమే కాదని, అవి ఆలోచనలకు ఆశ్రయమని, సమాజ మార్పుకు దారిచూపే దిక్సూచి అని ప్రముఖులు అభివర్ణించారు. జర్నలిజం అనేది కేవలం వార్తల ప్రసారం మాత్రమే కాదని, అది బాధ్యతతో కూడిన పథమని, నిబద్ధతతో నడిచే ప్రయాణమని, విలువల కోసం సాగించే యుద్ధమని వారు పేర్కొన్నారు.
ప్రస్తుత కాలంలో ఆశయం లేని అక్షరాలు, లక్ష్యంలేని ఉద్యమాలు శబ్దాలకే పరిమితం అవుతున్నాయని, కానీ నిజమైన జర్నలిజం ప్రజల కష్టాలను ప్రతిబింబిస్తుందని, అన్యాయాన్ని నిలదీస్తుందని, దాచిన సత్యాన్ని వెలికి తీస్తుందని వారు తెలిపారు. అక్షరాలకు ఒక స్పష్టమైన దిశ ఉండాలని, ఆ దిశ సమాజాన్ని ముందుకు నడిపించేదిగా ఉండాలని వారు సూచించారు.
జర్నలిస్టుల పాత్ర ఇక్కడే ప్రారంభమవుతుందని, వారి కలం కేవలం కథనాల కోసం కాదని, సమాజానికి విలువలు నేర్పించడానికి అని వారు వివరించారు. ఒక జర్నలిస్ట్ తన స్వార్థాన్ని పక్కనపెట్టి ప్రజల ప్రయోజనాలను ముందుంచినప్పుడే అతని అక్షరాలకు విశ్వాసం ఏర్పడుతుందని తెలిపారు.
ప్రజాస్వామ్యం ఒక నిర్మాణం అయితే జర్నలిజం దానికి కాపలాదారు అని, ఆ కాపలాదారు చేతిలో ఉన్న కలం అంకుశంలా పనిచేయాలని, అధికారాన్ని అదుపులో ఉంచాలని, తప్పులను ఎత్తిచూపాలని, మూగవారికి గొంతుకగా నిలవాలని వారు అభిలషించారు.
ప్రస్తుత మీడియా రంగంలో పెట్టుబడులు పెరుగుతున్నాయని, కానీ విలువలు తగ్గుతున్నాయనే ఆందోళన పెరుగుతోందని వారు ఆవేదన వ్యక్తం చేశారు. ఈ ధోరణి ప్రమాదకరమని, ప్రజలు మీడియాపై నమ్మకం కోల్పోతే సమాజం దారి తప్పే ప్రమాదం ఉందని వారు హెచ్చరించారు. కాబట్టి మీడియా మళ్లీ తన అసలైన విలువల వైపు తిరగాలని, నిజం చెప్పడం జర్నలిజం ప్రాణమని వారు నొక్కి చెప్పారు.
