భైంసాలోని గోపాల్ రావు పాటిల్ ప్రభుత్వ డిగ్రీ కళాశాల ఈ విద్యా సంవత్సరం నుండి విద్యార్థుల నైపుణ్యాభివృద్ధిని లక్ష్యంగా చేసుకుని రెండు నూతన కోర్సులను ప్రవేశపెడుతోంది. ఇందులో బీ.కామ్ లో BFSI, బీఎస్సీ లో డైరీ & పౌల్ట్రీ సైన్స్ లో AEDP కోర్సులు ఉన్నాయి.
కళాశాల ప్రిన్సిపాల్ కర్రోళ్ల బుచ్చయ్య తెలిపిన వివరాల ప్రకారం, బీ.కామ్ విభాగంలో బ్యాంకింగ్, ఫైనాన్షియల్ సర్వీసెస్ అండ్ ఇన్సూరెన్స్ (BFSI) కోర్సును, బీఎస్సీ విభాగంలో డైరీ మరియు పౌల్ట్రీ సైన్స్ లో అప్రెంటిస్షిప్ ఎంబెడెడ్ డిగ్రీ ప్రోగ్రామ్ (AEDP) ప్రారంభించనున్నారు. ఈ కోర్సులు విద్యార్థులకు పరిశ్రమ-ఆధారిత శిక్షణను అందించేందుకు ఉద్దేశించబడ్డాయి.
ఈ కోర్సులు మూడు సంవత్సరాల కాలవ్యవధి కలిగి ఉంటాయి. ఇవి యూజీసీ మరియు నేషనల్ ఎడ్యుకేషన్ పాలసీ (NEP-2020) మార్గదర్శకాలకు అనుగుణంగా రూపొందించబడ్డాయి. కోర్సు నిర్మాణంలో భాగంగా, విద్యార్థులు రెండు సంవత్సరాలు తరగతి గది బోధనలో పాల్గొంటారు. మూడవ సంవత్సరం తప్పనిసరిగా వేతనంతో కూడిన ఉద్యోగ శిక్షణ (ఆన్ జాబ్ ట్రైనింగ్) పొందాల్సి ఉంటుంది.
ఈ నూతన విద్యా విధానం ద్వారా విద్యార్థులలో ఆచరణాత్మక నైపుణ్యాలను పెంపొందించడం, తద్వారా వారికి మెరుగైన ఉద్యోగ అవకాశాలను కల్పించడం ప్రభుత్వ ఆశయమని ప్రిన్సిపాల్ వివరించారు. విద్యార్థులు ఈ అవకాశాన్ని సద్వినియోగం చేసుకోవాలని సూచించారు.
