చెన్నై, August 1, 2026
చైనాలో ఎగిరే కారు (ఫ్లయింగ్ కార్) మార్కెట్లోకి ప్రవేశించాలన్న వోక్స్వ్యాగన్ కంపెనీ ప్రయత్నాలు విఫలమయ్యాయి. సాంకేతిక సమస్యలు, చట్టపరమైన వివాదాలు, దేశీయ కంపెనీల నుంచి తీవ్ర పోటీ వంటి కారణాలతో ఈ ప్రాజెక్టును చివరికి రద్దు చేశారు. చైనా మొబిలిటీ రంగంలో విదేశీ కంపెనీలు ఎదుర్కొంటున్న సవాళ్లకు ఇది నిదర్శనంగా నిలుస్తోంది.
చైనాలో అభివృద్ధి చెందుతున్న ఎగిరే కారు (ఫ్లయింగ్ కార్) మార్కెట్లోకి ప్రవేశించాలని వోక్స్వ్యాగన్ కంపెనీ అనేక సంవత్సరాలుగా చేస్తున్న ప్రయత్నాలు విఫలమయ్యాయి. సాంకేతిక పరమైన ఎదురు దెబ్బలు, చట్టపరమైన వివాదాలు, దేశీయ తయారీదారుల నుంచి ఎదురవుతున్న తీవ్ర పోటీ దీనికి కారణం. వేగంగా అభివృద్ధి చెందుతున్న చైనా మొబిలిటీ రంగానికి అనుగుణంగా వ్యవహరించడంలో విదేశీ ఆటోమొబైల్ తయారీదారులకు సవాళ్లు పెరుగుతున్నాయని వోక్స్వ్యాగన్ ఉదంతం నిరూపిస్తోంది.
సంప్రదాయ వాహనాలకు భిన్నంగా విస్తరించడానికి, భవిష్యత్తులో పట్టణ వైమానిక రంగంలో తన స్థానాన్ని పదిలపరచుకోవడానికి జర్మనీకి చెందిన ఆటోమొబైల్ తయారీదారు వోక్స్వ్యాగన్ 2019లో ఎగిరే కారు ప్రాజెక్టును ప్రారంభించింది. రద్దీగా ఉండే రోడ్డు ప్రయాణానికి వేగవంతమైన ప్రత్యామ్నాయాలను కోరుకునే సంపన్న వినియోగదారులను లక్ష్యంగా చేసుకొని చైనాలోని ప్రధాన నగరాల మధ్య నడిచే ఎలక్ట్రిక్ వర్టికల్ టేకాఫ్ అండ్ ల్యాండింగ్ (ఈవీఎలఓటీ) విమానాన్ని అభివృద్ధి చేయడమే ఈ ప్రాజెక్టు ఉద్దేశం. తక్కువ దూరం ఉన్న నగరాల మధ్య ప్రయాణించగల నాలుగు సీట్ల ఎలక్ట్రిక్ ఫ్లయింగ్ వాహనాన్ని అభివృద్ధి చేయడానికి వోక్స్వ్యాగన్ బీజింగ్లో ఓ ప్రత్యేక పరిశోధన బృందాన్ని ఏర్పాటు చేసింది. సంప్రదాయ హెలికాప్టర్లతో పోలిస్తే ఇది నిశ్శబ్దంగా నడుస్తుంది. ఎలక్ట్రిక్ బ్యాటరీల సాయంతో దీనిని నడుపుతారు. ఇది పర్యావరణానికి ఎంతో అనుకూలమైనది.
వేగంగా విస్తరిస్తున్న పట్టణ జనాభా, పెరుగుతున్న సంపద, అధునాతన రవాణా సాంకేతికతలకు ప్రభుత్వ మద్దతు వంటి అంశాల కారణంగా చైనాను ఆదర్శవంతమైన మార్కెట్గా పరిగణించారు. ఫ్లయింగ్ కార్ల వ్యాపారం ఓ కొత్త మొబిలిటీ విభాగాన్ని సృష్టిస్తుందని, భవిష్యత్తులో వోక్స్వ్యాగన్ సంప్రదాయ ఆటోమోటివ్ కార్యకలాపాలకు ఇది భిన్నంగా నిలుస్తుందని అధికారులు భావించారు. అయితే సాంకేతికంగా ఎదురైన సమస్యలు ప్రాజెక్టు అమలును అడ్డుకున్నాయి. వోక్స్వ్యాగన్ తొలుత చైనా స్టార్టప్ కంపెనీ పాంటుయో ఏవియేషన్తో భాగస్వామ్యాన్ని కుదుర్చుకుంది. అయితే విమానం ఏరో డైనమిక్ డిజైన్, సాంకేతిక సాధ్యాసాధ్యాలపై ఇంజినీర్లు ఆందోళన వ్యక్తం చేశారు. ప్రాజెక్ట్ దిశపై విభేదాలు తలెత్తడంతో భాగస్వామ్యానికి తెర పడింది. ఆ తర్వాత వోక్స్వ్యాగన్ సంస్థ హునాన్ సన్వార్డ్ టెక్నాలజీని సంప్రదించింది. అది అప్పటికే కొన్ని పూర్తి స్థాయి నమూనాలను ఉత్పత్తి చేసింది. అయితే వేగంగా అభివృద్ధి చెందుతున్న దేశీయ కంపెనీల నుంచి వచ్చే పోటీని ఈ విమానం వాణిజ్యపరంగా తట్టుకోగలదా అన్న సందేహాలు వ్యక్తమయ్యాయి.
చైనా ఆటోమోటివ్- టెక్నాలజీ పరిశ్రమలో జరుగుతున్న విస్తృత పరివర్తనకు వోక్స్వ్యాగన్ వైఫల్యం అద్దం పట్టింది. అభివృద్ధి చెందుతున్న సాంకేతిక పరిజ్ఞానం విషయంలో చైనా దేశీయ కంపెనీలు ఎంతగా పోటీతత్వాన్ని పెంచుకుంటున్నాయో, అదే సమయంలో మార్కెట్కు అనుగుణంగా మారడానికి పెరుగుతున్న ఒత్తిడిని ఎలా అధిగమిస్తున్నాయో ఈ ఉదంతం నిరూపిస్తోంది. చైనా భవిష్యత్ మొబిలిటీ రంగంలో విజయం సాధించాలంటే కేవలం ప్రపంచ బ్రాండ్ గుర్తింపు ఉంటే సరిపోదని గుర్తు చేసింది. సాంకేతిక నాయకత్వం, బలమైన స్థానిక భాగస్వామ్యాలు, వేగంగా అభివృద్ధి చెందుతున్న దేశీయ ఆవిష్కరణలతో పోటీ పడగల సామర్ధ్యం పైనే విదేశీ సంస్థల విజయం ఆధారపడి ఉంటుంది.
