కుబీర్ ఎంపీడీవో కార్యాలయంలో సిబ్బంది కొరత: ప్రైవేట్ వ్యక్తుల ప్రమేయంపై అనుమానాలు

కుబీర్ మండల ప్రజా పరిషత్ కార్యాలయంలో నెలకొన్న సిబ్బంది కొరత ప్రజలకు తీవ్ర ఇబ్బందులు కలిగిస్తోంది. టైపిస్ట్, సూపర్డెంట్ పోస్టులు దీర్ఘకాలంగా ఖాళీగా ఉండటంతో, కార్యాలయ పనులు సకాలంలో పూర్తి కావడం లేదు. ఎంపీడీవో తరచుగా క్షేత్రస్థాయి పర్యటనలకు వెళ్లడంతో, ప్రజలు తమ పనుల నిమిత్తం కార్యాలయానికి వచ్చినప్పుడు అధికారుల అందుబాటులో లేకపోవడంతో నిరాశ చెందుతున్నారు.

టైపిస్ట్ పోస్ట్ ఖాళీగా ఉండటం వల్ల, కంప్యూటర్ ఆధారిత నివేదికలు, ఇతర అధికారిక పత్రాల తయారీలో అధికారులు ఇబ్బందులు ఎదుర్కొంటున్నట్లు సమాచారం. ఈ పరిస్థితుల్లో, కార్యాలయ పనుల నిర్వహణ కోసం ఒక ప్రైవేట్ వ్యక్తిని నియమించుకున్నారని, అతనికి కంప్యూటర్ లాగిన్‌లను కూడా అప్పగించారని తెలుస్తోంది.

ప్రభుత్వ లాగిన్‌లను ప్రైవేట్ వ్యక్తులకు అప్పగించడంపై పలువురు అనుమానాలు వ్యక్తం చేస్తున్నారు. మండల సమాచారం గోప్యతకు భంగం వాటిల్లే అవకాశం ఉందని, సైబర్ నేరాలు పెరుగుతున్న నేపథ్యంలో ఈ చర్యలు సురక్షితం కాదని వారు ఆందోళన వ్యక్తం చేస్తున్నారు. ముఖ్యంగా, గోప్యంగా ఉంచాల్సిన సమాచారం బయటకు పొక్కే ప్రమాదం ఉందని స్థానికులు అభిప్రాయపడుతున్నారు.

కుబీర్ మండలంలో 42 గ్రామపంచాయతీలు ఉన్నప్పటికీ, కార్యాలయానికి అవసరమైన సిబ్బందిని పూర్తిస్థాయిలో నియమించకపోవడంపై ప్రజలు అసంతృప్తి వ్యక్తం చేస్తున్నారు. జిల్లా ఉన్నతాధికారులు ఈ విషయాన్ని సీరియస్‌గా పరిగణించి, ఖాళీగా ఉన్న టైపిస్ట్ పోస్టులను వెంటనే భర్తీ చేయాలని, ప్రైవేట్ వ్యక్తుల ప్రమేయాన్ని నిలిపివేయాలని స్థానికులు కోరుతున్నారు.