తక్షణమే నూతన పీఆర్సీ ప్రకటించాలి: పీఆర్టీయూ తెలంగాణ

పీఆర్టీయూ తెలంగాణ జిల్లా గౌరవ అధ్యక్షులు కృపాల్ సింగ్ సోడి ఆదివారం మాట్లాడుతూ, తెలంగాణ ఆవిర్భావ దినోత్సవం సందర్భంగా జూన్ 2న నూతన పీఆర్సీని ప్రకటించాలని ప్రభుత్వాన్ని కోరారు. ఎన్నికల ముందు కాంగ్రెస్ పార్టీ ఇచ్చిన హామీలన్నింటినీ అమలు చేయాలని ఆయన సూచించారు.

ప్రభుత్వ సంక్షేమ పథకాలు ప్రజలకు చేరడంలో ఉద్యోగులు, ఉపాధ్యాయులు కీలక పాత్ర పోషిస్తున్నారని, వారి సంక్షేమాన్ని విస్మరించవద్దని ఆయన అన్నారు. కమిటీల పేరుతో కాలయాపన చేస్తే ప్రజల్లో, ఉద్యోగుల్లో ప్రభుత్వ విశ్వసనీయత దెబ్బతింటుందని ఆయన హెచ్చరించారు.

డీఏ బకాయిలు, పెన్షనర్ల ప్రయోజనాలు, పాత పెన్షన్ విధానం అమలు, హెల్త్ కార్డులు, పెండింగ్ బిల్లులపై తక్షణమే నిర్ణయం తీసుకోవాలని కృపాల్ సింగ్ సోడి ప్రభుత్వాన్ని కోరారు. ఈ సమస్యలన్నింటిపై దృష్టి సారించి, ఉద్యోగుల సంక్షేమాన్ని పరిగణనలోకి తీసుకోవాలని ఆయన విజ్ఞప్తి చేశారు.

నూతన పీఆర్సీని 1.7.2023 నుండి అమలు చేయాలని, తక్షణమే దీనిపై ప్రకటన విడుదల చేయాలని ఆయన డిమాండ్ చేశారు. ఉద్యోగ, ఉపాధ్యాయ, పెన్షనర్ల సంక్షేమాన్ని దృష్టిలో ఉంచుకుని ప్రభుత్వం తక్షణ చర్యలు తీసుకోవాలని ఆయన కోరారు.