దామరచర్ల మండలంలోని యాదాద్రి థర్మల్ పవర్ స్టేషన్ (వైటిపిఎస్) లో ఆదివారం సంభవించిన అగ్నిప్రమాదంపై మిర్యాలగూడ ఎమ్మెల్యే బత్తుల లక్ష్మారెడ్డి (బిఎల్ఆర్) సోమవారం పర్యటించి, అధికారులతో కలిసి పరిస్థితిని సమీక్షించారు. ప్రమాదంలో కంట్రోల్ కేబుల్స్, వాల్వ్లు దెబ్బతిన్నాయని, అయితే ప్రధాన యంత్రాలకు నష్టం జరగలేదని తెలిపారు.
యాదాద్రి థర్మల్ పవర్ స్టేషన్ యూనిట్-3లో టర్బైన్ డ్రైవెన్ బాయిలర్ ఫీడ్ పంప్ వద్ద లూబ్రికేషన్ ఆయిల్ లీక్ అవ్వడం వల్ల అగ్నిప్రమాదం సంభవించింది. ఈ ఘటనపై ఎమ్మెల్యే బిఎల్ఆర్ అధికారులతో చర్చించారు.
ఎమ్మెల్యే కంట్రోల్ రూమ్కు వెళ్లి సీసీటీవీ ఫుటేజీని పరిశీలించి, ప్రమాదానికి గల కారణాలపై ఆరా తీశారు. ఈ పర్యటనలో పలువురు అధికారులు, ప్రజా ప్రతినిధులు పాల్గొన్నారు.
ప్రమాదం జరిగిన వెంటనే అగ్నిమాపక సిబ్బంది సకాలంలో స్పందించి మంటలను అదుపులోకి తీసుకురావడంతో పెద్ద ప్రమాదం తప్పింది. దీనివల్ల యంత్రాలకు జరిగిన నష్టం పరిమితంగా ఉందని అధికారులు తెలిపారు.
భవిష్యత్తులో ఇలాంటి సంఘటనలు పునరావృతం కాకుండా పటిష్టమైన భద్రతా చర్యలు చేపట్టాలని ఎమ్మెల్యే అధికారులకు సూచించారు. పవర్ ప్లాంట్ కార్యకలాపాలు యథావిధిగా కొనసాగేలా చూడాలని ఆదేశించారు.
