తెలంగాణ ప్రభుత్వం రైతు భరోసా పథకం కింద రెండో విడత పెట్టుబడి సాయాన్ని ఏప్రిల్ 15న విడుదల చేయనుంది. యాసంగి సీజన్కు సంబంధించి రైతులు ఎదురుచూస్తున్న ఈ ఆర్థిక సహాయం పంపిణీకి ప్రభుత్వం ముహూర్తం ఖరారు చేసింది.
రైతు భరోసా పథకం ద్వారా ప్రభుత్వం ఎకరాకు రూ. 6,000 చొప్పున మూడు విడతల్లో ఆర్థిక సహాయం అందిస్తోంది. ఇప్పటికే మొదటి విడత నిధులను రైతుల ఖాతాల్లో జమ చేసిన ప్రభుత్వం, ఏప్రిల్ 15న రెండో విడత నిధులను విడుదల చేయడానికి సిద్ధమైంది. ఈ నెల చివరి నాటికి మొత్తం మూడు విడతల పంపిణీని పూర్తి చేయాలని లక్ష్యంగా పెట్టుకుంది.
రెండో విడతలో భాగంగా, ఐదు ఎకరాల వరకు భూమి ఉన్న అర్హులైన రైతులందరికీ ఆర్థిక సహాయం అందజేయబడుతుందని అధికారిక వర్గాలు తెలిపాయి. మొదటి విడతలో అందిన మొత్తాన్ని మినహాయించి, మిగిలిన విస్తీర్ణానికి సరిపడా బ్యాలెన్స్ మొత్తాన్ని ఈ విడతలో జమ చేస్తారు.
అర్హులైన రైతులకు సకాలంలో చెల్లింపులు జరిగేలా చూడటానికి, రెండో విడత పంపిణీ కోసం సుమారు రూ. 2,700 కోట్లను సమకూర్చుకోవాలని ఆర్థిక శాఖను ఆదేశించినట్లు సంబంధిత వర్గాలు వెల్లడించాయి. ఈ నిధుల విడుదలతో యాసంగి సీజన్లో రైతులకు కొంతమేర ఊరట లభించనుంది.
