తెలంగాణలో విద్యా వ్యవస్థలో భారీ సంస్కరణ: పాఠశాల విద్యలోకి ఇంటర్ విలీనం

తెలంగాణ ప్రభుత్వం పాఠశాల విద్యలోకి ఇంటర్మీడియట్ విద్యను విలీనం చేసే ప్రక్రియను ప్రారంభించింది. జాతీయ విద్యావిధానం 2020 ప్రకారం, స్కూల్ విద్యను 12వ తరగతి వరకు ఒకే వ్యవస్థ కిందకు తీసుకురావాలనే లక్ష్యంతో ఈ నిర్ణయం తీసుకున్నట్లు అధికారులు తెలిపారు. ఈ విలీనం ద్వారా ఇంటర్మీడియట్ విద్యా మండలి (బోర్డు) రద్దు అయ్యే అవకాశం ఉంది. పాఠశాల, ఇంటర్ విద్యలకు ఒకే పరీక్షల బోర్డును ఏర్పాటు చేసే యోచనలో ప్రభుత్వం ఉన్నట్లు సమాచారం.

రాష్ట్రవ్యాప్తంగా 100 ప్రభుత్వ పాఠశాలలను ఎంపిక చేసి, 2026-27 విద్యా సంవత్సరం నుంచి 11వ తరగతి బోధన ప్రారంభించేందుకు ప్రణాళికలు సిద్ధం చేస్తున్నారు. దీని ద్వారా పదో తరగతి ఉత్తీర్ణులైన విద్యార్థులు ఇకపై జూనియర్ కళాశాలలకు వెళ్లకుండా, తమ పాఠశాలల్లోనే 11, 12వ తరగతులు పూర్తి చేయగలరు. ఈ సంస్కరణ అమలుకు అవసరమైన మార్గదర్శకాలను సిద్ధం చేయాలని విద్యాశాఖ అధికారులను ముఖ్యమంత్రి రేవంత్ రెడ్డి ఆదేశించారు.

ఈ విలీన ప్రక్రియలో భాగంగా, తెలంగాణ ఎడ్యుకేషన్ యాక్టు (1982)ను సవరించడంతో పాటు, తెలంగాణ ఇంటర్‌మీడియట్‌ విద్యా చట్టాన్ని (1971) రద్దు చేయాల్సి ఉంటుంది. ప్రభుత్వ పరీక్షల విభాగం (ఎస్‌ఎస్‌సీ బోర్డు), ఇంటర్‌మీడియట్‌ విద్యామండలి (ఇంటర్‌బోర్డు)లను కలిపి ఒకే ఉమ్మడి బోర్డుగా ఏర్పాటు చేసే అవకాశం ఉంది. ఈ ప్రతిపాదనపై కేంద్ర ప్రభుత్వం కూడా సానుకూలంగా ఉందని, రాష్ట్రాలు ఈ దిశగా చర్యలు తీసుకోవాలని సూచించినట్లు తెలుస్తోంది.

పాఠశాల విద్యలోకి ఇంటర్ విద్యను విలీనం చేయడం వల్ల విద్యార్థుల డ్రాపవుట్ రేటును తగ్గించవచ్చని, ముఖ్యంగా వెనుకబడిన వర్గాల విద్యార్థులు ఉన్నత విద్యను కొనసాగించేందుకు ఇది దోహదపడుతుందని ప్రభుత్వం భావిస్తోంది. సమగ్ర శిక్షా, పీఎం శ్రీ వంటి కేంద్ర పథకాల కింద మరిన్ని నిధులు పొందడంతో పాటు, పాఠశాలల్లో మౌలిక సదుపాయాలను మెరుగుపరచుకోవచ్చని అంచనా వేస్తున్నారు. ఉమ్మడి ల్యాబ్‌లు, లైబ్రరీల వినియోగం, బోధనా సిబ్బంది సమన్వయం వంటి ప్రయోజనాలు కూడా ఉంటాయని అధికారులు పేర్కొన్నారు.