రైతు భరోసా రెండో విడత నిధుల విడుదల: ఏప్రిల్ రెండో వారంలో జమ

తెలంగాణ ప్రభుత్వం రైతు భరోసా పథకం రెండో విడత నిధులను ఏప్రిల్ రెండో వారంలో విడుదల చేయనుంది. ఈ మేరకు ముఖ్యమంత్రి రేవంత్ రెడ్డి ఆదేశాల మేరకు అధికారులు కార్యాచరణ సిద్ధం చేశారు. ఆర్థిక శాఖ ఈ విడత కోసం సుమారు రూ.2,650 కోట్లను సమీకరించే పనిలో ఉంది. ప్రభుత్వ ఖర్చులు, ఇతర చెల్లింపులతో పాటు రైతులకు భరోసా కింద అవసరమైన నిధులను అందించేందుకు ప్రణాళికలు రూపొందించారు.

రెండో విడతలో, సుమారు 5 ఎకరాల వరకు భూమి కలిగిన రైతులకు ప్రాధాన్యం ఇవ్వనున్నట్లు ప్రభుత్వం స్పష్టం చేసింది. ఇప్పటికే మొదటి విడతలో భాగంగా మార్చి 22న 70 లక్షల మంది రైతులకు రూ.3,590 కోట్లను జమ చేశారు. దీంతో వ్యవసాయ పనులకు కొంత ఆర్థిక ఊరట లభించింది. మిగతా రైతులకు మూడో విడతలో నిధులు అందించేందుకు ప్రభుత్వం ప్రణాళిక సిద్ధం చేసింది. ఈ నెలాఖరు నాటికి మొత్తం చెల్లింపులు పూర్తి చేయాలని నిర్ణయించింది.

ప్రతి సీజన్‌కు ఎకరాకు రూ.6 వేల చొప్పున సాయం అందిస్తున్న ఈ పథకం అమలుకు మొత్తం సుమారు రూ.9 వేల కోట్లు అవసరమని అంచనా వేయబడింది. నిధుల పరిమితి కారణంగా ప్రభుత్వం ఈసారి మూడు దశల్లో డబ్బులు విడుదల చేస్తోంది. రెండో విడత నిధులపై స్పష్టత రావటంతో, పెద్ద సంఖ్యలో రైతులకు ప్రయోజనం చేకూరనుంది.

తెలంగాణ ప్రభుత్వం రైతులకు ఇచ్చిన హామీ మేరకు రైతు భరోసా పథకాన్ని అమలు చేస్తోంది. ఈ పథకం ద్వారా రైతులకు ఆర్థికంగా అండగా నిలబడటమే ప్రభుత్వ లక్ష్యం. రెండో విడత నిధులు విడుదలైన తర్వాత, పలువురు రైతులు తమ వ్యవసాయ అవసరాలను తీర్చుకోవడానికి వీలు కలుగుతుంది.