మిర్యాలగూడ మున్సిపాలిటీలో ఏసీబీ దాడులు: అవినీతి ఆరోపణలపై విచారణ

ఏసీబీ డిఎస్పీ జగదీష్ చంద్ర నేతృత్వంలోని బృందం ఉదయం మున్సిపల్ కార్యాలయంలోకి ప్రవేశించి, సిబ్బంది నుంచి సెల్ ఫోన్లు, ఫైళ్లను స్వాధీనం చేసుకుంది. కార్యాలయ గేట్లకు తాళాలు వేసి, రికార్డుల పరిశీలన ప్రారంభించింది. ఈ దాడులతో మున్సిపల్ కార్యాలయంలో కలకలం రేగింది.

ఇటీవల కాలంలో మున్సిపల్ కార్యాలయంలో పలు అవినీతి ఆరోపణలు, పనులు చేయకుండానే నిధుల డ్రా వంటి ఆరోపణలపై ఫిర్యాదులు అందాయని, ఈ నేపథ్యంలోనే ఏసీబీ అధికారులు సోదాలు చేపట్టినట్లు సమాచారం.

ఈ దాడులు అర్ధరాత్రి వరకు కొనసాగే అవకాశం ఉందని అధికారులు తెలిపారు. సోదాల అనంతరం మరిన్ని వివరాలు వెల్లడయ్యే అవకాశం ఉంది. ఈ దాడుల వల్ల మున్సిపల్ కార్యకలాపాలు తాత్కాలికంగా నిలిచిపోయాయి.