జర్నలిజం పరిమితులు ప్రజాస్వామ్యానికి రక్షణ కవచాలు: ఎపురి రాజా రత్నం

జర్నలిజం అనేది కేవలం వార్తలను ప్రచురించే వృత్తి మాత్రమే కాదని, అది ప్రజాస్వామ్యానికి దిశానిర్దేశం చేసే బాధ్యతాయుతమైన వ్యవస్థ అని, అందుకే పత్రికా రచనలకు కొన్ని నైతిక, చట్టబద్ధ పరిమితులు అవసరమని ఎపురి రాజా రత్నం పేర్కొన్నారు. దేశ భద్రతకు, ప్రాదేశిక సమగ్రతకు భంగం కలిగించే అంశాలను ప్రచారం చేయకూడదనే బాధ్యత ప్రతి జర్నలిస్టుపై ఉంటుందని ఆయన అన్నారు.

విదేశీ, దేశీయ సంబంధాలను దెబ్బతీసే విధంగా వార్తలు, వ్యాఖ్యలు ఉండకూడదని, సమాజంలో అశాంతిని, విద్వేషాన్ని రెచ్చగొట్టే రచనలు జర్నలిజం ధర్మానికి విరుద్ధమని తెలిపారు. అశ్లీలతను ప్రోత్సహించే కథనాలు, ఉద్రేకాలను రెచ్చగొట్టే ప్రచారాలు బాధ్యతాయుతమైన పత్రికారంగానికి తగవని ఆయన అభిప్రాయపడ్డారు. కోర్టులపై నిరాధార విమర్శలు చేయడం, న్యాయస్థాన తీర్పులను అవమానించే రీతిలో వ్యాఖ్యానించడం సరైన పత్రికా ధోరణి కాదని, ప్రజాస్వామ్య వ్యవస్థలో న్యాయ వ్యవస్థకు ఉన్న గౌరవాన్ని జర్నలిస్టులు కాపాడాల్సిన బాధ్యత ఉందని ఆయన నొక్కి చెప్పారు.

ఒక సమాచారం అందిందంటే దానిని యథా తథంగా ప్రచురించడం జర్నలిజం కాదని, ఆ సమాచారంలో నిజమెంత, అసత్యమెంత అన్నది ధృవీకరించడం పత్రిక బాధ్యత అని రాజా రత్నం తెలిపారు. ప్రస్తుతం కొన్ని మీడియా సంస్థలు ఎలాంటి పరిశీలన లేకుండా వచ్చిన సమాచారాన్ని ప్రచురించడం ఆందోళన కలిగించే విషయమని, ఇది జర్నలిజం ప్రమాణాలనే ప్రశ్నించే పరిస్థితిని తీసుకొస్తోందని అన్నారు. జర్నలిస్టు పాత్రలో అత్యుత్సాహం కంటే వాస్తవాన్ని వాస్తవంగానే చూపించడం ముఖ్యమని, అసంపూర్ణ సమాచారం ఆధారంగా కథనాలు నిర్మించడం కంటే నిజానిజాలు నిర్ధారించుకోవడం అవసరమని ఆయన పేర్కొన్నారు.

ప్రయత్నించినా పూర్తి ఆధారాలు లభించని సందర్భాల్లో నిరూపించలేని అంశాలను వదిలేయడం కూడా బాధ్యతాయుతమైన జర్నలిజమేనని, ఎందుకంటే ప్రతి నిజం ప్రజా ప్రయోజనానికి ఉపయోగపడుతుందా లేదా అన్నది కూడా అంచనా వేయాల్సిందేనని ఆయన అన్నారు. వాస్తవాలపై నిలబడని వ్యాఖ్యలు బాధ్యతాయుత రచనగా పరిగణించబడవని, విషపూరిత ప్రచారం, నిరూపించలేని ఆరోపణలు చట్టవిరుద్ధమే కాకుండా జర్నలిస్టు వృత్తి ధర్మానికి విరుద్ధమని తెలిపారు. నిజం ఆధారంగా చేసే విశ్లేషణ, ప్రజా ప్రయోజనాన్ని కాపాడే వ్యాఖ్యలే నిజమైన పత్రికా రచనలని, జర్నలిజం బ్రతకాలి అంటే పత్రికా పరిమితులను గౌరవించే సంస్కృతి అవసరమని ఆయన సూచించారు.