-రేవంత్ పాలన అట్టర్ ప్లాఫ్ , అడుగంటిన కాంగ్రెస్ గ్రాఫ్

-సీఎం రేవంత్ ధోరణి డిల్లీలో బానిసత్వం, తెలంగాణలో క్రూరత్వం

–మళ్ళీ కేసీఆర్ ముఖ్యమంత్రి అయితేనే తెలంగాణకు స్వర్ణయుగం

_బీ ఆర్ఎస్ నేత, మాజీ ఎమ్మెల్యే జీవన్ రెడ్డి

ఆర్మూర్, సెప్టెంబర్ 2:- రేవంత్ పాలన అట్టర్ ప్లాఫ్ కాగా కాంగ్రెస్ గ్రాఫ్ పూర్తిగా అడుగంటి పోయిందని బీ ఆర్ ఎస్ నిజామాబాద్ జిల్లా అధ్యక్షుడు, ఆర్మూర్ మాజీ ఎమ్మెల్యే ఆశన్నగారి జీవన్ రెడ్డి అన్నారు. కాంగ్రెస్ వెయ్యి రోజుల పాలనా వైఫల్యాలను ఎండ గడుతూ బుధవారం ఆర్మూర్ పట్టణంలో జరిగిన ఆందోళన కార్యక్రమంలో ఆయన మాట్లాడుతూ ఇది ప్రజాపాలన కాదు పిచ్చి తుగ్లక్ పాలనగా అభివర్ణించారు. కాంగ్రెస్ ప్రభుత్వ వెయ్యి రోజుల పాలన అంతా డంబాచారం .. గోబెల్స్ ప్రచారం అని ఆయన కొట్టిపారేశారు.అప్పులు, తప్పులు చేయడం తప్ప, కాంగ్రెస్ పాలనలో ఏమున్నది గర్వకారణమన్నారు. దేవుళ్లపై ఒట్లు, ఆరు గ్యారెంటీలకు తూట్లు, కేసీఆర్ కు తిట్లు వెయ్యి రోజుల కాలంలో రేవంత్ నోరు తెరిస్తే అబద్దాలు. అడుగుదీసి అడుగే స్తే మోసాలు. కాంగ్రెస్ కు అధికారం తెలంగాణకు మళ్లీ అంధకారం అని జీవన్ రెడ్డి నిప్పులు చెరిగారు. కాంగ్రెస్ వెయ్యి రోజుల పాలనలో ఒక్క హామీ అయినా అమలు జరిగిందా? అని ఆయన నిలదీశారు.ప్రజలకిచ్చిన వాగ్దానాలు అమలు చేయకుండా దగా చేశారని, ఆరు గ్యారెంటీలు, 420 హామీలను బొంద పెట్టారని, ప్రజల దృష్టిని మళ్లించేందుకు డైవర్షన్ పొలిటిక్స్ చేయడంలో రేవంత్ రెడ్డి ఆరితేరారని ఆయన విమర్శించారు. డమ్మీ సీఎం రేవంత్ పై ప్రజలకు నమ్మకం లేదన్నారు. మోడీ, చంద్రబాబు తో కలిసి తెలంగాణ ను నాశనం చేస్తున్న రేవంత్ రెడ్డి ముఖ్యమంత్రిగా కేసీఆర్ ఫ్యామిలీని తిట్టుడు తప్ప ప్రజలకు పెట్టుడు లేదని ఆయన అన్నారు. దేవుళ్ళ సాక్షిగా రేవంత్ రెడ్డి చేసిన ప్రమాణాలేమ య్యాయని ఆయన నిలదీశారు. ఇంకా రుణమాఫీ కాని రైతులు లక్షల మంది ఉన్నారన్నారు. రూ. 15వేల చొప్పున రైతు భరోసా ఇస్తామని చెప్పి మాటతప్ప లేదా? అని ఆయన మండిపడ్డారు. రైతుభరోసా కింద పెట్టుబడి సాయం అందక రైతుకు నానా అవస్థలు పడుతున్నారని ఆవేదన వ్యక్తం చేశారు. ఆసరా పెన్షన్లు పెంచి రూ.4వేల చొప్పున ఇస్తామన్న హామీ ఏమైందని జీవన్ రెడ్డి ప్రశ్నించారు. ఏడాదికి 2 లక్షల ఉద్యోగాలు ఇస్తామన్న హామీని బుట్ట దాఖలు చేశారని ఆయన విమర్శించారు. మహిళలకు రూ.2500 చొప్పున ఇస్తామన్న మహాలక్ష్మి పథకాన్ని తుంగలో తొక్కారన్నారు. విద్యార్థినులకు స్కూటీలు ఎప్పుడిస్తారని ఆయన ప్రస్తావించారు. కళ్యాణ లక్ష్మి ద్వారా ఒక్కరికైనా తులం బంగారం ఇచ్చారా? అని ఆయన ధ్వజమెత్తారు. డమ్మీ సీఎం రేవంత్ పై ప్రజలకు నమ్మకం లేదన్నారు. కాంగ్రెస్ ప్రభుత్వం చేసిన ఒక్క మంచి పని కూడా చేయలేదని ఆయన విమర్శించారు. రైతు బంధు కు రాం రాం పలికిండ్రు .దళిత బంధు కు నై భీమ్ అన్నరు. సగం కూడా కాని రుణ మాఫీతో రైతుల బతుకులు ఆగమామయినయి. 24 గంటల కరెంట్ మాయం, మళ్ళీ వ్యవసాయానికి గాయం అని జీవన్ రెడ్డి దుయ్యబట్టారు. నిరుద్యోగులకు అతీగతి లేని నిరుద్యోగ భృతి అని, ఆడపిల్లలకు ఇస్తామన్న స్కూటీలు ఏమయ్యాయని, పెన్షన్లు పెంచుతామని అవ్వా తాతలకు టోపీ పెట్టారని ఆయన గుర్తు చేస్తూ కళ్యాణ లక్ష్మి, షాదీ ముబారక్ కింద ఒక్కరికైనా తులం బంగారం ఇచ్చారా? అని ప్రశ్నించారు.కాళేశ్వరంపై నిందలు, కృష్ణా గోదావరి జలాలపై తప్పుడు ప్రచారం, టెలిఫోను ట్యాపింగ్ వంటివి కాంగ్రెస్ కుట్రలో భాగమేనని ఆయన ఆరోపించారు. కాంగ్రెస్ గ్రాండ్రింపులకు, బెదిరింపులకు భయపడేది లేదని, కేసీఆర్ అన్నట్లుగా తెలంగాణ రాష్ట్ర ప్రజలను వంచిస్తున్న కాంగ్రెస్ నేతల తోలు తీసుడేనని జీవన్ రెడ్డి హెచ్చరించారు.

*ఇందిరమ్మ రాజ్య మంటే మీ ఇష్టారాజ్యమా?*

ఇందిరమ్మ రాజ్య మంటే మీ ఇష్టారాజ్యమా? అని జీవన్ రెడ్డి మండిపడ్డారు. ప్రజా పాలనంటే పోలీసు రాజ్యమా? అని ఆయన ప్రశ్నిస్తూ రాష్ట్రంలో హిట్లర్ పాలన నడుస్తోందని ఆయన ఆరోపించారు. ఇందిరమ్మ రాజ్యమంటేనే హింసాత్మక ప్రభుత్వం అని ఆయన మండిపడ్డారు. ఆర్మూరు నుంచి హైదరాబాద్ వరకు అప్రకటిత ఎమర్జెన్సీ కొనసాగుతోందని, బీ ఆర్ ఎస్ లక్ష్యంగా పోలీసులు వెంటాడుతున్నారని ఆయన ఆవేదన వ్యక్తం చేశారు. ప్రజాస్వామ్య బద్దంగా నిరసన తెలిపే హక్కు ప్రతి పక్షానికి లేదా? అని జీవన్ రెడ్డి ప్రశ్నించారు. సీఎం రేవంత్ ధోరణి డిల్లీలో బానిసత్వం, తెలంగాణలో క్రూరత్వం అన్న విధంగా ఉందని ఆయన ఎద్దేవా చేశారు.మళ్ళీ కేసీఆర్ ముఖ్యమంత్రి అయితేనే తెలంగాణకు స్వర్ణయుగం వస్తుందని జీవన్ రెడ్డి స్పష్టం చేశారు. ఈ కార్యక్రమంలో బిఆర్ఎస్ పార్టీ నాయకులు, కార్యకర్తలు పెద్ద ఎత్తున పాల్గొన్నారు.