కార్మికులకు నష్టం కలిగించే లేబర్ కోడ్స్ రద్దుకై మేడే పోరాట స్ఫూర్తితో ఉద్యమించాలని భారత కార్మిక సంఘాల సమాఖ్య (IFTU) జిల్లా ప్రధాన కార్యదర్శి ఎం. హరిత పిలుపునిచ్చారు. నిర్మల్ జిల్లా బైంసా పట్టణంలో మేడే పోస్టర్లను విడుదల చేసిన సందర్భంగా ఆమె ఈ వ్యాఖ్యలు చేశారు.
IFTU జిల్లా ప్రధాన కార్యదర్శి ఎం. హరిత మాట్లాడుతూ, శ్రమకు తగ్గ వేతనాలు, మెరుగైన పని పరిస్థితులు, పనిగంటల తగ్గింపుల కోసం కార్మిక వర్గం చారిత్రాత్మక పోరాటాలు సాగించిందని గుర్తుచేశారు. 1886 మే 1న అమెరికాలోని చికాగోలో 8 గంటల పని దినం కోసం కార్మికులు చేపట్టిన నిరసనలు, వాటి పర్యవసానాలను ఆమె ప్రస్తావించారు.
ప్రస్తుత కేంద్ర ప్రభుత్వం కార్పొరేట్ వర్గాలకు అనుకూలంగా కార్మిక వ్యతిరేక చట్టాలను అమలు చేస్తోందని ఆమె ఆరోపించారు. బీడీ పరిశ్రమను దెబ్బతీసే COTPA చట్టాన్ని రద్దు చేయాలని, కార్మికులకు కనీస పెన్షన్ రూ.9 వేలు అందించాలని, పెరుగుతున్న ధరలకు అనుగుణంగా వేతనాలను పెంచాలని ఆమె డిమాండ్ చేశారు.
లేబర్ కోడ్స్ రద్దు కోసం పోరాటాన్ని మరింత ఉధృతం చేయాలని, 140వ మేడేను విజయవంతం చేయాలని ఆమె కార్మికులకు పిలుపునిచ్చారు. ఈ కార్యక్రమంలో పలువురు IFTU నాయకులు, కార్యకర్తలు పాల్గొన్నారు.
