భైంసాలో ప్రజల ఫిర్యాదులను స్వీకరించిన జిల్లా ఎస్పీ డా. జానకి షర్మిల

నిర్మల్ జిల్లా ఎస్పీ డా. జి. జానకి షర్మిల ఐపీఎస్, భైంసా ఎస్పీ క్యాంప్ కార్యాలయంలో ఏర్పాటు చేసిన గ్రీవెన్స్ డే కార్యక్రమంలో పాల్గొన్నారు. ఈ సందర్భంగా భైంసా సబ్‌డివిజన్ పరిధిలోని వివిధ గ్రామాల నుంచి వచ్చిన ఆర్జిదారుల నుండి నేరుగా ఫిర్యాదులను స్వీకరించారు. ప్రతి ఫిర్యాదుపై తక్షణమే స్పందించాలని అధికారులకు సూచించారు.

ఫిర్యాదుదారుల ఎదుటే సంబంధిత పోలీస్ స్టేషన్ల అధికారులతో ఫోన్ ద్వారా సంప్రదించి, బాధితులకు చట్టపరంగా అవసరమైన సహాయాన్ని వెంటనే అందించాలని ఎస్పీ ఆదేశించారు. సమస్యలను త్వరితగతిన పరిష్కరించే దిశగా చర్యలు చేపట్టాలని సంబంధిత అధికారులకు స్పష్టమైన ఆదేశాలు జారీ చేశారు.

ఈ కార్యక్రమంలో భాగంగా, కుటుంబ వివాదాలకు సంబంధించిన కొన్ని సమస్యలపై 'షీ టీం' సిబ్బంది ఇరు వర్గాలకు కౌన్సిలింగ్ నిర్వహించారు. ఈ కౌన్సిలింగ్ ద్వారా కొన్ని కుటుంబాలు తిరిగి సయోధ్య కుదుర్చుకున్నట్లు తెలిసింది. స్థానికంగానే కౌన్సిలింగ్ సదుపాయం కల్పించడం పట్ల బాధితులు సంతృప్తి వ్యక్తం చేశారు.

గతంలో గ్రీవెన్స్‌లో అందిన ఫిర్యాదుల పరిష్కార స్థితిని, పెండింగ్‌లో ఉన్న ఫిర్యాదుల పురోగతిని కూడా ఎస్పీ అధికారులను అడిగి తెలుసుకున్నారు. పెండింగ్‌లో ఉన్న కేసులను వేగంగా పరిష్కరించాలని సూచిస్తూ, ప్రజలకు సత్వర న్యాయం అందించేందుకు కృషి చేయాలని సూచించారు.