అమరావతి, 2026-08-06
రాజధాని అమరావతి భూ సమీకరణ పథకాన్ని ప్రభుత్వం మరింత విస్తరిస్తోంది. రెండో విడతలో భాగంగా ఇప్పటికే 20,494 ఎకరాలను సమీకరించిన ప్రభుత్వం, తాజాగా మూడో విడత ప్రక్రియను కూడా చేపట్టాలని నిర్ణయించింది. ఇందులో భాగంగా తొలిదశలో తాడికొండ మండలంలోని మోతడక గ్రామంలో 2,340 ఎకరాల భూమిని సమీకరించాలని అధికారులు యోచిస్తున్నారు.
రాజధాని అమరావతి భూ సమీకరణ పథకాన్ని ప్రభుత్వం మరింత విస్తరిస్తోంది. రెండో విడతలో భాగంగా ఇప్పటికే 20,494 ఎకరాలను సమీకరించిన ప్రభుత్వం, తాజాగా మూడో విడత ప్రక్రియను కూడా చేపట్టాలని నిర్ణయించింది. ఇందులో భాగంగా తొలిదశలో తాడికొండ మండలంలోని మోతడక గ్రామంలో 2,340 ఎకరాల భూమిని సమీకరించాలని అధికారులు యోచిస్తున్నారు. రైల్వే ప్రాజెక్టు అవసరాల కోసం ఈ భూమిని సమీకరిస్తున్నామని, గ్రామస్తుల అభ్యర్థన మేరకే ఈ ప్రక్రియ చేపడుతున్నామని ప్రభుత్వం చెబుతున్నప్పటికీ, వాస్తవానికి గతంలోనే ఈ ప్రాంతంలో భూ సమీకరణకు వీలుగా గ్రామసభలు నిర్వహించినట్లు తెలుస్తోంది.
మోతడకలో సమీకరణ వివరాలు
తాడికొండ మండలంలోని మోతడక గ్రామంలో మొత్తం 2,376 ఎకరాల భూమి ఉండగా, సమీకరణ పథకం కింద దాదాపు పూర్తి భూమిని తీసుకోవాలని నిర్ణయించారు. గ్రామంలో మొత్తం 972 నివాసాలు ఉండగా, సుమారు 3,200 మంది నివసిస్తున్నారు. తాడికొండ మండలం మొత్తంలో 48,500 ఎకరాల భూమి అందుబాటులో ఉంది. గతంలో ఈ మండలం పరిధిలోని గ్రామాల్లో భూ సమీకరణకు వీలుగా గ్రామసభలు నిర్వహించారు. మొత్తం 12 రెవెన్యూ గ్రామాల్లో ఈ సభలు పూర్తి చేశారు. వాటిల్లో తాడికొండ పరిధిలోని పాములపాడు, బండారుపల్లె, పొన్నెకల్లు, రావెల, లామ్, బేజాత్పురం, దామరపల్లె గ్రామాలు కూడా ఉన్నాయి.
గ్రామసభల తీరుతెన్నులు
గత అనుభవాలను దృష్టిలో ఉంచుకుని, ఈసారి మొత్తం గ్రామాలను ఒకేసారి కాకుండా, గ్రామసభలు నిర్వహించి, ప్రజల అంగీకారం పొందిన తర్వాతే భూ సమీకరణ పథకాన్ని అమలు చేయాలని నిర్ణయించారు. ఇందులో భాగంగానే ఈ ప్రక్రియను చేపడుతున్నారు. ముఖ్యంగా రైల్వేలైను ఏర్పాటు కోసమే భూ సమీకరణ చేస్తున్నామని చెబుతున్నప్పటికీ, వాస్తవానికి అంతకు ముందే ఈ గ్రామాలను రాజధానిలో కలపాలనే నిర్ణయం తీసుకున్నట్లు తెలుస్తోంది. ప్రస్తుతం మోతడకలో 2340 ఎకరాలు సమీకరించేందుకు ప్రణాళిక సిద్ధమైంది.
గ్రామసభల్లో పూలింగు కోసం తీర్మానం
కూటమి ప్రభుత్వం ఏర్పాటైన అనంతరం, తుళ్లూరు మండలంలోని మిగిలిన గ్రామాలతో పాటు అమరావతి, తాడికొండ, పెదకూరపాడు మండలాల పరిధిలోని పలు గ్రామాల్లోనూ గ్రామసభలు నిర్వహించారు. ఈ గ్రామసభల్లో తాడికొండలో 5179 హెక్టార్లు, బందరుపల్లిలో 1930, పాములపాడులో 1694, పొన్నెకల్లులో 1546, కంతేరులో 1486, రావెలలో 1460, బేజాత్పురంలో 1342, లామ్లో 1208, దామరపల్లెలో 1168 హెక్టార్ల భూమిని సమీకరణ కింద ఇచ్చేలా ఎమ్మెల్యే తదితరులు గ్రామసభల్లో తీర్మానం చేయించారు. అయితే, నిడుముక్కల గ్రామంలో 815 హెక్టార్ల భూమిని సమీకరించాలని తీర్మానం చేసినప్పటికీ, రెండో విడత గ్రామసభలో అక్కడి ప్రజలు దీనిని వ్యతిరేకించారు. తాము భూమిని సమీకరణకు ఇవ్వబోమని వారు అభ్యంతరం వ్యక్తం చేశారు.
