భైంసా పట్టణం, మండల పరిధిలోని ప్రైవేట్ పాఠశాలల్లో విద్యా హక్కు చట్టం (ఆర్టీఈ) ప్రకారం పేద, బలహీన వర్గాల పిల్లలకు కేటాయించాల్సిన 25 శాతం ఉచిత ప్రవేశాల కోటా అమలు కావడం లేదని 'మన బడి పరిరక్షణ బృందం' ఆరోపించింది. ఈ మేరకు బృందం ప్రజా ఫిర్యాదు విభాగంలో సబ్ కలెక్టర్కు వినతి పత్రం అందజేసింది.
విద్యా హక్కు చట్టం ప్రకారం ప్రతి ప్రైవేట్ పాఠశాలలో పేద పిల్లలకు 25 శాతం సీట్లు ఉచితంగా కేటాయించాల్సి ఉందని, అయితే భైంసా ప్రాంతంలోని పలు పాఠశాలలు ఈ నిబంధనలను పాటించడం లేదని 'మన బడి పరిరక్షణ బృందం' చైర్మన్ సుంకేట మహేష్ బాబు తెలిపారు. అధికారులు ప్రభుత్వం నుంచి తిరిగి చెల్లింపులు రావడం లేదని చెబుతున్నప్పటికీ, చట్టం ప్రకారం ముందుగా విద్యార్థులకు ప్రవేశాలు కల్పించి, అనంతరం ప్రభుత్వం నుంచి రావాల్సిన మొత్తాన్ని పొందే అవకాశం ఉందని ఆయన పేర్కొన్నారు.
ఈ విషయంపై సబ్ కలెక్టర్ అజ్మీరా సంకేత్ కుమార్ స్పందించి, జిల్లా విద్యాశాఖ అధికారికి లేఖ రాసినట్లు బృందం తెలిపింది. 'మన బడి పరిరక్షణ బృందం' 2026-27 విద్యా సంవత్సరం నుంచి ఆర్టీఈ ప్రకారం 25 శాతం ఉచిత ప్రవేశాలను పూర్తిస్థాయిలో అమలు చేయాలని, నిబంధనలు పాటించని ప్రైవేట్ పాఠశాలలపై కఠిన చర్యలు తీసుకోవాలని కోరింది.
తమ డిమాండ్లను వెంటనే పరిష్కరించకపోతే విద్యార్థి సంఘాలు, తల్లిదండ్రులతో కలిసి పెద్ద ఎత్తున ఆందోళన కార్యక్రమాలు చేపడతామని బృందం సభ్యులు హెచ్చరించారు.
