పశుసంపదను వ్యాధుల నుండి రక్షించేందుకు ఉద్దేశించిన ఉచిత గాలి కుంటు వ్యాధి నివారణ టీకాల పంపిణీ కార్యక్రమం ఇచ్చోడ పశువైద్యశాలలో బుధవారం ప్రారంభమైంది. పశు సంవర్ధక శాఖ ఆధ్వర్యంలో ఈ కార్యక్రమం నిర్వహించబడుతోంది.
ఇచ్చోడ గ్రామ సర్పంచ్ జలై జాకు, ఉపసర్పంచ్ లోక శిరీష్ రెడ్డి ఈ కార్యక్రమాన్ని పశువులకు టీకాలు వేసి ప్రారంభించారు. ఈ సందర్భంగా వారు మాట్లాడుతూ, రైతులు తమ పశువుల ఆరోగ్యాన్ని కాపాడుకోవడానికి సంవత్సరానికి కనీసం రెండుసార్లు గాలి కుంటు వ్యాధి నివారణ టీకాలు తప్పనిసరిగా వేయించాలని సూచించారు.
ఈ టీకాల ద్వారా పశువులు వ్యాధుల బారిన పడకుండా ఉంటాయని, తద్వారా పశుసంపదను సంరక్షించుకోవచ్చని వారు తెలిపారు.
ఈ కార్యక్రమంలో ఆదిలాబాద్ జిల్లా పశుసంవర్ధక శాఖ ఏడీ రామారావు, ఇచ్చోడ మండల పశు వైద్యాధికారి గోవింద్ నాయక్, వెటర్నరీ అసిస్టెంట్ సంధ్య రెడ్డి, ఇతర సిబ్బంది, పలువురు రైతులు పాల్గొన్నారు.
పశుసంపద రైతులకు ముఖ్యమైన ఆదాయ వనరు కావడంతో, పశువుల ఆరోగ్యంపై ప్రత్యేక శ్రద్ధ వహించాలని అధికారులు రైతులకు సూచించారు.
