మిర్యాలగూడ మండలం వెంకటాద్రిపాలెం రెవెన్యూ పరిధిలో తన భూమిలో 14 గుంటలు అక్రమంగా కబ్జా చేశారని పట్టాదారుడు తెడ్ల శ్రీకాంత్ ఆరోపించారు. దీనిపై విచారణ జరిపి చర్యలు తీసుకోవాలని ఆయన అధికారులను కోరారు.
శనివారం మిర్యాలగూడలో ఏర్పాటు చేసిన విలేకరుల సమావేశంలో శ్రీకాంత్ మాట్లాడుతూ, తన వారసత్వంగా వచ్చిన రెండు ఎకరాల భూమిలో ఒక ఎకరాన్ని 2013లో విక్రయించానని, మిగిలిన ఎకరం తన పేరు మీద ఉందని తెలిపారు. అయితే, జంకు తండాకు చెందిన కొందరు వ్యక్తులు, అందులో ఒక ఎక్సైజ్ ఉన్నతోద్యోగి, వారి సోదరులు తన భూమిలోని 14 గుంటలను ఆక్రమించి గడ్డి వాము వేశారని ఆరోపించారు.
తన భూమిలోకి వెళ్లి అడిగితే బెదిరిస్తున్నారని, భూమికి సంబంధించిన ఎలాంటి ఆధారాలు, పత్రాలు వారి వద్ద లేవని శ్రీకాంత్ పేర్కొన్నారు. బోగస్ పత్రాలతో తన భూమిని కబ్జా చేసే ప్రయత్నం చేస్తున్నారని ఆయన ఆవేదన వ్యక్తం చేశారు.
ఈ విషయమై మిర్యాలగూడ సబ్ కలెక్టర్, రూరల్ పోలీస్ స్టేషన్లలో ఫిర్యాదు చేసినట్లు తెలిపారు. అక్రమంగా వేసిన గడ్డివామును తొలగించి, తన భూమిని తిరిగి అప్పగించేలా రెవెన్యూ అధికారులు చర్యలు తీసుకోవాలని ఆయన విజ్ఞప్తి చేశారు.
ఈ సమస్యపై మరింతగా దృష్టి సారించి, 27వ తేదీన నల్గొండ జిల్లా కలెక్టర్ కు కూడా ఫిర్యాదు చేయనున్నట్లు శ్రీకాంత్ వెల్లడించారు. తన భూమిని కబ్జా చేసిన వారిపై విచారణ జరిపి, తనకు న్యాయం చేయాలని ఆయన అధికారులను కోరారు.
