మిర్యాలగూడ, 2025-08-18
నల్గొండ జిల్లాలోని ప్రతి నియోజకవర్గానికి ఇందిరా మహిళా శక్తి పథకం ద్వారా మండల మహిళా సమైక్యలకు పెట్రోల్ బంకులు మంజూరు అయ్యాయని జిల్లా డి.ఆర్.డి.ఏ. పిడి శేఖర్ రెడ్డి తెలిపారు. మిర్యాలగూడలో మంగళవారం జరిగిన విలేకరుల సమావేశంలో ఆయన ఈ వివరాలను వెల్లడించారు.
నల్గొండ జిల్లాలోని ప్రతి నియోజకవర్గానికి ఇందిరా మహిళా శక్తి పథకం ద్వారా మండల మహిళా సమైక్యలకు పెట్రోల్ బంకులు మంజూరు అయ్యాయని జిల్లా గ్రామీణాభివృద్ధి సంస్థ (డి.ఆర్.డి.ఏ.) ప్రాజెక్ట్ డైరెక్టర్ (పిడి) శేఖర్ రెడ్డి తెలిపారు. మంగళవారం మిర్యాలగూడలో విలేకరుల సమావేశంలో ఆయన మాట్లాడుతూ, ఇటీవల మంత్రి వెంకట్ రెడ్డి చేతుల మీదుగా నల్గొండలో ఏర్పాటు చేసిన పెట్రోల్ బంకును ప్రారంభించామని, అది విజయవంతంగా నడుస్తోందని, త్వరలోనే షాపింగ్ కాంప్లెక్స్ ఏర్పాటు చేసి మరింత అభివృద్ధి చేయనున్నట్లు తెలిపారు.
పెట్రోల్ బంకుల కేటాయింపు
పెట్రోల్ బంకుల కేటాయింపు హెచ్పిసిఎల్, బిపిఎల్, ఐ ఓ సి ఎల్ వంటి కంపెనీలలో ప్రభుత్వ నిబంధనలకు అనుగుణంగా అర్హులైన వారికి ఇవ్వనున్నామని శేఖర్ రెడ్డి పేర్కొన్నారు. మహిళా సమైక్య సభ్యులు రెండు షిఫ్టులలో బంకులలో పనిచేయాల్సి ఉంటుందని తెలిపారు. దేవరకొండ, చండూర్, నకిరేకల్, మిర్యాలగూడ మండలం తడకమళ్ళ, అనుముల గ్రామాలలో పెట్రోల్ బంకులు ఏర్పాటు చేయనున్నామని, రెవెన్యూ శాఖ ప్రభుత్వ స్థలాన్ని కేటాయించిన వెంటనే బంకుల ఏర్పాటుకు చర్యలు తీసుకుంటామని చెప్పారు. తడకమళ్ళలో బంకు ఏర్పాటు చేయనున్న స్థలాన్ని మంగళవారం పరిశీలించడం జరిగిందని ఆయన వివరించారు.
రైస్ మిల్లులు, ఆర్టీసీ బస్సులు
నల్గొండ నియోజకవర్గ పరిధిలోని నల్గొండ, కనేకల్, తిప్పర్తి మండలాల్లోని మహిళా సమైక్యలకు రైస్ మిల్లులు మంజూరు చేసినట్లు శేఖర్ రెడ్డి తెలిపారు. ప్రతి మండల సమైక్యకు ఒక ఆర్టీసీ బస్సును నడిపేందుకు ఇవ్వగా, జిల్లాలో ఇప్పటికే 30 బస్సులు మండల సమైక్యల ద్వారా నడుస్తున్నాయని, ఇప్పటివరకు వాటి ద్వారా రూ.70 వేల ఆదాయం సమైక్యలకు వచ్చిందని ఆయన పేర్కొన్నారు.
సోలార్ ప్రాజెక్టులు, గోదాములు
నల్గొండ జిల్లాకు రెండు సోలార్ ప్రాజెక్టులు మంజూరయ్యాయని, ఆ ప్రాజెక్టులను కూడా మండల మహిళా సమైక్యల ద్వారానే నడపనున్నామని తెలిపారు. జిల్లాలోని తిరుమలగిరి సాగర్ మండలంలోని అల్వాల్, చండూరు మండల కేంద్రాలలో సోలార్ ప్రాజెక్టులను ఏర్పాటు చేసేందుకు చర్యలు తీసుకుంటున్నామని చెప్పారు. ధాన్యం నిల్వ చేసుకునేందుకు మహిళా సమైక్యలకు గోదాములను నిర్మించి ఇవ్వనున్నట్లు ఆయన పేర్కొన్నారు.
భీమా, ఆరోగ్య పథకాలు
మహిళా సమైక్య సంఘాల సభ్యులకు లోన్ మరియు భీమా పాలసీ సౌకర్యం కల్పించామని శేఖర్ రెడ్డి తెలిపారు. ప్రమాదవశాత్తు సభ్యులు మరణిస్తే రూ.2 లక్షలు, ప్రమాద బీమా పాలసీ కింద సభ్యులు యాక్సిడెంట్ లో మరణిస్తే రూ.10 లక్షల భీమా నగదును కుటుంబానికి అందిస్తామని చెప్పారు. జిల్లాలో మొట్టమొదటిసారిగా మహిళా సమైక్య సంఘ సభ్యులకు చిట్యాల మండల కేంద్రంలో హెల్త్ స్కీమును ప్రారంభించామని, సంఘంలోని మహిళలందరికీ ఆరోగ్య పరీక్షలు చేయిస్తున్నామని తెలిపారు.
