పేదల ఆత్మగౌరవానికి ఇందిరమ్మ ఇళ్ల పథకం ప్రతీక అని ఉమ్మడి ఆదిలాబాద్ జిల్లా ఇంచార్జ్ మంత్రి జూపల్లి కృష్ణారావు పేర్కొన్నారు. సోమవారం జరిగిన ఉన్నత స్థాయి సమీక్షలో, ఇళ్ల నిర్మాణ పనులను వేగవంతం చేయాలని, లబ్ధిదారుల దరఖాస్తులను సకాలంలో పరిష్కరించాలని అధికారులను ఆదేశించారు.
హిమాయత్నగర్లోని హౌసింగ్ కార్పొరేషన్ కార్యాలయంలో జరిగిన ఈ సమీక్షలో రాష్ట్ర గృహనిర్మాణ శాఖ మంత్రి పొంగులేటి శ్రీనివాస్ రెడ్డి, కార్మిక శాఖ మంత్రి వివేక్ వెంకటస్వామి కూడా పాల్గొన్నారు. ఉమ్మడి ఆదిలాబాద్ జిల్లాలో ఇందిరమ్మ ఇళ్ల నిర్మాణ పనులను వేగవంతం చేయాలని, క్షేత్రస్థాయిలో పురోగతిని నిరంతరం పర్యవేక్షించాలని మంత్రులు అధికారులను ఆదేశించారు.
నిర్మాణ ప్రక్రియలో అధునాతన సాంకేతికతను ఉపయోగించాలని, లబ్ధిదారుల దరఖాస్తులను వారం రోజులకు మించి పెండింగ్లో ఉంచరాదని మంత్రి జూపల్లి కృష్ణారావు స్పష్టం చేశారు. సిబ్బంది కొరతను అధిగమించడానికి డిప్యుటేషన్లపై అధికారులను తెచ్చుకోవాలని సూచించారు.
ఇళ్లు నిర్మించుకోలేని నిరుపేదలకు స్వయం సహాయక సంఘాలు లేదా బ్యాంకుల ద్వారా రుణాలు అందేలా చర్యలు తీసుకోవాలని, వాటిని దశలవారీగా తీర్చేలా చూడాలని అధికారులకు సూచనలు అందాయి. ఈ సమావేశంలో పలువురు ఎంపీలు, ఎమ్మెల్సీలు, ఎమ్మెల్యేలు, కలెక్టర్లు, ఇతర ఉన్నతాధికారులు పాల్గొన్నారు. జిల్లాల వారీగా ఇళ్ల మంజూరు, పురోగతి, సాంకేతిక ఇబ్బందులపై చర్చించారు.
