చిత్తూరు, 2026-06-05
శాలువా కప్పుకోవడం కంటే, ఆ డబ్బుతో అరటిపళ్లు కొని తెస్తే ఆకలి తీరుతుందని అన్న మాజీ ముఖ్యమంత్రి, స్వాతంత్ర్య సమరయోధుడు టంగుటూరి ప్రకాశం పంతులు జీవితం ఎందరికో స్ఫూర్తిదాయకం. నేటి రాజకీయ నాయకులతో పోలిస్తే, ఒకప్పుడు ఎమ్మెల్యేలుగా, ముఖ్యమంత్రులుగా పనిచేసినవారు సైకిళ్లపై తిరుగుతూ, సామాన్యుల జీవితాలను ప్రతిబింబించేవారు. కానీ నేడు, కొద్ది కాలంలోనే కోట్ల సంపాదనలు ఆర్జిస్తూ, ఉన్నత జీవనశైలిని అలవర్చుకుంటున్నారు.
శాలువా కప్పుకోవడం కంటే, ఆ డబ్బుతో అరటిపళ్లు కొని తెస్తే ఆకలి తీరుతుందని అన్న మాజీ ముఖ్యమంత్రి, స్వాతంత్ర్య సమరయోధుడు టంగుటూరి ప్రకాశం పంతులు జీవితం ఎందరికో స్ఫూర్తిదాయకం. నేటి రాజకీయ నాయకులతో పోలిస్తే, ఒకప్పుడు ఎమ్మెల్యేలుగా, ముఖ్యమంత్రులుగా పనిచేసినవారు సైకిళ్లపై తిరుగుతూ, సామాన్యుల జీవితాలను ప్రతిబింబించేవారు. కానీ నేడు, కొద్ది కాలంలోనే కోట్ల సంపాదనలు ఆర్జిస్తూ, ఉన్నత జీవనశైలిని అలవర్చుకుంటున్నారు.
పేదరికం నుండి మహానాయకుడిగా ఎదుగుదల
టంగుటూరి ప్రకాశం పంతులు బాల్యం పేదరికంలోనే గడిచింది. నాలుగో తరగతి చదువుతున్నప్పుడు, పరీక్ష ఫీజు చెల్లించడానికి మూడు రూపాయలు లేక, ఆ డబ్బుల కోసం తన గ్రామానికి 25 మైళ్ల దూరంలో ఉన్న తన బావగారి ఇంటికి కాలి నడకన బయలుదేరాడు. అక్కడ కూడా డబ్బులు దొరక్క నిరాశతో ఇంటికి తిరిగి వచ్చాడు. అతని పరిస్థితికి చలించిపోయిన తల్లి, తన పెళ్లి నాటి పట్టుచీరను అమ్మి ఆ మూడు రూపాయల ఫీజు చెల్లించింది. ఆ తర్వాత ఎన్నో కష్టాలను ఎదుర్కొని, న్యాయవాద విద్యను అభ్యసించి, ఇంగ్లాండ్ వెళ్లి బారిష్టర్ పట్టా పొందారు. మద్రాస్ మైలాపూర్ లోని తమిళ మేధావులతో పోటీపడి, 1917-18 నాటికే రోజుకు వెయ్యి రూపాయల ఫీజు వసూలు చేసే స్థాయికి ఎదిగి, కోస్తా జిల్లాలలో భూములు, బంగళాలు కొనుగోలు చేసేంతటి సంపన్నుడిగా ఎదిగారు.
జాతీయోద్యమంలో క్రియాశీల పాత్ర
మహాత్మా గాంధీ పిలుపుతో తన న్యాయవాద వృత్తిని వదిలి, జాతీయోద్యమంలోకి దూకారు. న్యాయవాదిగా ఎంతోమందిని జైళ్ల నుంచి విడిపించిన ఆయన, స్వాతంత్ర్యం కోసం తాను స్వచ్ఛందంగా జైలు శిక్షను అనుభవించారు. గాంధీజీ ఆశయాల ప్రచారం కోసం స్వరాజ్య పత్రికను స్థాపించి, ఆయన నిజమైన అనుచరుడిగా గుర్తింపు పొందారు. కొందరి పుకార్లను విని గాంధీజీ ప్రకాశం పంతులును తప్పుపట్టినప్పుడు, ఆయన గాంధీజీని సైతం నిలదీశారు. సైమన్ కమీషన్ కు వ్యతిరేకంగా మద్రాస్ నగరంలో జరిగిన హర్తాళ్ సందర్భంగా, బ్రిటిష్ వారి తుపాకులకు తన గుండెనే ఎదురుగా నిలిపారు.
రాష్ట్ర సాధన, తొలి ముఖ్యమంత్రిగా సేవలు
ఆనాటి ఉమ్మడి మద్రాస్ రాష్ట్రానికి రెవిన్యూ మంత్రిగా, ముఖ్యమంత్రిగా సేవలందించిన ప్రకాశం పంతులు, తెలుగు వారికి ప్రత్యేక రాష్ట్రం ఏర్పడినప్పుడు (1953) తొలి ముఖ్యమంత్రిగా బాధ్యతలు స్వీకరించారు. దురాశాపరుల కుట్రల వలన, అప్పటి శాసనసభ స్పీకర్ యొక్క అవివేకం వలన, కేవలం ఒక్క ఓటు తేడాతో ప్రభుత్వం పతనమైనప్పుడు, వ్యతిరేకంగా ఓటు వేసినవారు తమ తప్పును గ్రహించి, తిరిగి ఓటింగ్ నిర్వహించాలని బ్రతిమాలినా వినకుండా, శాసనసభ నుండి నేరుగా గవర్నర్ వద్దకు వెళ్లి తన రాజీనామాను సమర్పించారు. కేవలం 13 నెలల తన పాలనా కాలంలో, ఆ రోజుల్లోనే 14 నీటిపారుదల ప్రాజెక్టులను ప్రారంభించారు. శ్రీ వేంకటేశ్వర విశ్వవిద్యాలయం, తెలుగు వారికి హైకోర్టు, తిరుమల తిరుపతి దేవస్థానం నిర్వహణలో సంస్కరణలు వంటి ఎన్నో కీలకమైన అభివృద్ధి పనులు చేపట్టారు. సహకార రంగంలో తెలుగు రాష్ట్రాన్ని అగ్రస్థానంలో నిలిపారు.
