ఆసిఫాబాద్, 2026-08-19
ఆసిఫాబాద్ నియోజకవర్గంలో కాంగ్రెస్ ప్రభుత్వం చేపడుతున్న అభివృద్ధి కార్యక్రమాలను అడ్డుకోవద్దని, అలా చేస్తే ప్రజలే బుద్ధి చెబుతారని జిల్లా కాంగ్రెస్ పార్టీ అధ్యక్షురాలు ఆత్రం సుగుణక్క అన్నారు. మంగళవారం డీసీసీ కార్యాలయంలో జరిగిన మీడియా సమావేశంలో ఆమె ఎమ్మెల్యే కోవ లక్ష్మిపై తీవ్రంగా స్పందించారు.
ఆసిఫాబాద్ నియోజకవర్గంలో కాంగ్రెస్ ప్రభుత్వం చేపడుతున్న అభివృద్ధి కార్యక్రమాలను అడ్డుకోవడం ఎమ్మెల్యే కోవ లక్ష్మి మానుకోవాలని జిల్లా కాంగ్రెస్ పార్టీ అధ్యక్షురాలు ఆత్రం సుగుణక్క ఘాటుగా అన్నారు. జిల్లా గ్రంథాలయ సంస్థ చైర్మన్ అనిల్ కుమార్, మాజీ డీసీసీ అధ్యక్షులు కొక్కిరాల విశ్వప్రసాద్ రావుతో కలిసి డీసీసీ కార్యాలయంలో నిర్వహించిన మీడియా సమావేశంలో ఆమె మాట్లాడారు. మంగళవారం జిల్లా పర్యటనకు వచ్చిన మంత్రి జూపల్లి కృష్ణారావు వాస్తవాలు మాట్లాడారని, బీఆర్ఎస్ ప్రభుత్వం రాష్ట్రాన్ని అప్పుల ఊబిలోకి నెట్టేసి వెళ్లిందని సుగుణక్క అన్నారు. గత ప్రభుత్వం చేసిన అప్పులను తీర్చుకుంటూనే కాంగ్రెస్ ప్రభుత్వం ప్రజలకు ఇచ్చిన హామీలను ఒక్కొక్కటిగా అమలు చేస్తోందన్నారు.
బీఆర్ఎస్ విమర్శలపై సుగుణక్క స్పందన
బీఆర్ఎస్ ప్రభుత్వం ఒక్క డబుల్ బెడ్రూమ్ ఇల్లు కూడా నిర్మించలేదని మంత్రి ప్రశ్నిస్తే దానికి సమాధానం చెప్పాల్సిన బాధ్యత ఎమ్మెల్యే కోవ లక్ష్మిపై ఉందన్నారు. కానీ సమాధానం చెప్పలేక అసెంబ్లీ, సెక్రటేరియట్ కట్టాం.. అది మీ అయ్య కట్టాడా అంటూ మంత్రిని వ్యక్తిగతంగా విమర్శించడం ఆమె స్థాయికి తగదని అన్నారు. అసెంబ్లీ, సెక్రటేరియట్ ఎవరి సొంత ఆస్తులు కావని, అవి ప్రజల సొమ్ముతో, ప్రభుత్వ నిధులతో నిర్మించినవేనని సుగుణక్క స్పష్టం చేశారు. ప్రజల డబ్బుతో కట్టిన భవనాలను తమ పార్టీ నాయకుడి ఘనతగా చెప్పుకోవడం ఏమిటని ప్రశ్నించారు. పాత అసెంబ్లీ భవనం ఉన్నా దానిని కూల్చి, అప్పులు చేసి కొత్త భవనాలు నిర్మించిన చరిత్ర బీఆర్ఎస్ ప్రభుత్వానిదేనని విమర్శించారు.
అభివృద్ధి పనులపై దృష్టి పెట్టాలని సూచన
మీ ప్రభుత్వం అప్పులు చేసి ఏం చేసిందో ప్రజలకు తెలుసు. ఆ అప్పుల భారాన్ని ఇప్పుడు కాంగ్రెస్ ప్రభుత్వం మోస్తోంది. అయినా ప్రజలకు ఇచ్చిన హామీలను అమలు చేస్తున్నాం. మీకు చేతనైతే అభివృద్ధి పనులను చూసి నేర్చుకోండి.. అని సుగుణక్క అన్నారు. మహిళలకు కుట్టు మిషన్లు, పేదలకు ఇందిరమ్మ ఇళ్ల ప్రొసీడింగ్స్ పంపిణీ చేయడానికి మంత్రి వస్తే ఆ కార్యక్రమంలో గొడవ సృష్టించే ప్రయత్నం ఎందుకని ప్రశ్నించారు. ప్రజలకు ఉపయోగపడే కార్యక్రమాలను అడ్డుకోవడం ద్వారా ఎవరికి నష్టం జరుగుతుందో ఎమ్మెల్యే ఆలోచించుకోవాలని సూచించారు. మంత్రి జూపల్లి కృష్ణారావుకు నష్టం లేదు.. నష్టం జరిగేది ఆసిఫాబాద్ ప్రజలకే అని అన్నారు.
నియోజకవర్గానికి నిధుల కేటాయింపు
ఎమ్మెల్యే చేయాల్సిన పనులను కాంగ్రెస్ నాయకులుగా తాము చేస్తున్నామని, మంత్రులను కలిసి నియోజకవర్గానికి నిధులు తీసుకొస్తున్నామని తెలిపారు. నియోజకవర్గ అభివృద్ధి కోసం ప్రభుత్వం వద్దకు వెళ్లి నిధులు అడుగుతున్నామని చెప్పారు. అందులో భాగంగానే మంత్రి జూపల్లి పర్యాటక శాఖ నుంచి ఆసిఫాబాద్ నియోజకవర్గానికి రూ.10 కోట్లు కేటాయిస్తామని ప్రకటించడం ఇందుకు నిదర్శనమన్నారు. రూ.10 కోట్లు నియోజకవర్గానికి తీసుకొచ్చిన మంత్రిని అభినందించాల్సింది పోయి వ్యక్తిగత విమర్శలు చేయడం ఏమిటి అభివృద్ధి కావాలా.. రాజకీయ రాద్ధాంతం కావాలా అనేది ఎమ్మెల్యే తేల్చుకోవాలి.. అని సుగుణక్క అన్నారు.
