రాష్ట్ర ఖజానా ఖాళీ? కాగ్ నివేదికతో వెలుగులోకి ఆర్థిక సంక్షోభం

2025-26 ఆర్థిక సంవత్సరానికి గాను రూ.2.29 లక్షల కోట్ల రెవెన్యూ రాబడులను ప్రభుత్వం అంచనా వేయగా, జనవరి నాటికి కేవలం రూ.1.38 లక్షల కోట్లు మాత్రమే సమకూరింది. ఇది అంచనాల్లో 60.23 శాతానికే పరిమితమైంది. ఆర్థిక సంవత్సరం ముగింపు దశకు చేరుకున్నా, మిగిలిన కాలంలో ఈ లక్ష్యాన్ని చేరుకోవడం దాదాపు అసాధ్యమని కాగ్ నివేదిక స్పష్టం చేస్తోంది.

రాష్ట్ర పన్ను రాబడి లక్ష్యం రూ.1.75 లక్షల కోట్లు కాగా, జనవరి నాటికి రూ.1.26 లక్షల కోట్లు మాత్రమే వసూలయ్యాయి. ఇది అంచనాల్లో 72 శాతంగా ఉంది. గత ప్రభుత్వాల హయాంలో పన్ను రాబడి గణనీయంగా వృద్ధి చెందగా, ప్రస్తుత పాలనలో ఈ వృద్ధి రేటు మందగించిందని నివేదిక పేర్కొంది. పన్నేతర ఆదాయం, కేంద్ర గ్రాంట్లు కూడా ఆశించిన స్థాయిలో లేవని కాగ్ తెలిపింది.

ఆదాయ లోటును భర్తీ చేసుకునేందుకు ప్రభుత్వం అప్పులపైనే ఎక్కువగా ఆధారపడుతోంది. బడ్జెట్‌లో రూ.54,009 కోట్ల మేర అప్పులు చేస్తామని పేర్కొన్న ప్రభుత్వం, జనవరి నాటికే రూ.69,148 కోట్లు అప్పు చేసింది. ఇది అంచనా పరిమితికి 128 శాతం మించి ఉంది. దీంతో రాష్ట్ర ద్రవ్యలోటు, ప్రాథమిక లోటు గణనీయంగా పెరిగాయి.

ఆర్థిక నిపుణుల అభిప్రాయం ప్రకారం, పెరుగుతున్న వడ్డీ చెల్లింపులు, మందగించిన ఆదాయం, అదుపు తప్పిన వ్యయాలను సకాలంలో అరికట్టకపోతే, రాష్ట్రం దీర్ఘకాలిక రుణ సంక్షోభంలో కూరుకుపోయే ప్రమాదం ఉంది. ప్రభుత్వం తక్షణమే ఆర్థిక క్రమశిక్షణ పాటించి, వ్యయాలను అదుపులోకి తీసుకురావాల్సిన అవసరం ఉందని వారు సూచిస్తున్నారు.