వాతావరణ మార్పుల హెచ్చరిక: 'సూపర్ ఎల్ నినో' ముప్పు పొంచి ఉంది, దేశవ్యాప్తంగా వర్షపాతం తగ్గే అవకాశం

అంతర్జాతీయ వాతావరణ సంస్థల నివేదికల ప్రకారం, పసిఫిక్ మహాసముద్రంలో ఉపరితల ఉష్ణోగ్రతలు అసాధారణంగా పెరుగుతున్నాయి. ఇది 'ఎల్ నినో' ప్రభావం తీవ్రతరం కావడానికి దారితీయవచ్చని భావిస్తున్నారు. ప్రపంచ వాతావరణ సంస్థ (WMO) మే రెండో వారం నుంచే దీని ప్రభావం ప్రారంభమయ్యే అవకాశం ఉందని, జులై నాటికి మరింత బలపడవచ్చని హెచ్చరించింది. గతంలో 1876-77 కాలంలో సంభవించిన మహా కరువు పరిస్థితులు మళ్లీ తలెత్తుతాయా అన్న అనుమానాలు వ్యక్తమవుతున్నాయి.

దేశవ్యాప్తంగా వర్షపాతం తగ్గే అవకాశాలున్నాయని, ముఖ్యంగా పశ్చిమ కనుమల్లో వర్షాలు పడకపోతే కృష్ణా, గోదావరి నదుల్లో నీటి ప్రవాహం గణనీయంగా తగ్గే ప్రమాదం ఉందని నివేదికలు సూచిస్తున్నాయి. దీని ప్రభావం తెలంగాణ సాగునీటి రంగంపై తీవ్రంగా పడే అవకాశాలున్నాయని అంచనా వేస్తున్నారు. అమెరికాకు చెందిన NOAA, బ్రిటన్ వాతావరణ శాఖ, యూఎస్ క్లైమేట్ ప్రెడిక్షన్ సెంటర్లు కూడా ఈ విషయంలో హెచ్చరికలు జారీ చేశాయి.

సాధారణంగా పసిఫిక్ మహాసముద్రంలో ఉష్ణోగ్రతలు 0.5 నుంచి 1 డిగ్రీల వరకు పెరిగితే సాధారణ ఎల్ నినోగా, 1 నుంచి 2 డిగ్రీల మధ్య ఉంటే మోస్తరు ఎల్ నినోగా, 2 డిగ్రీలకు మించి పెరిగితే ‘సూపర్ ఎల్ నినో’గా పరిగణిస్తారు. ప్రస్తుతం మార్చి నుంచే ఉష్ణోగ్రతలు పెరుగుతున్నాయని NOAA వెల్లడించింది. ఇప్పటికే 0.6 డిగ్రీల పెరుగుదల నమోదైందని తెలిపింది. ఇండోనేషియా, సౌత్ ఈస్ట్ ఏషియా ప్రాంతాల్లో ఇప్పటికే ప్రభావం కనిపిస్తోంది. మేఘాల ఏర్పాటుకు ఆటంకం కలిగించే ఔట్‌గోయింగ్ లాంగ్‌వేవ్ రేడియేషన్ (OLR) పెరగడంతో వర్షాలు తగ్గి, ఉష్ణోగ్రతలు పెరుగుతున్నాయి.

తెలంగాణలో కూడా ఎల్ నినో ప్రభావం స్పష్టంగా కనిపించే అవకాశముందని అధికారులు భావిస్తున్నారు. సాధారణంగా 92% వర్షపాతం నమోదు కావాల్సి ఉండగా, ఈసారి 5% వరకు లోటు ఉండవచ్చని అంచనా. మహారాష్ట్ర, కర్ణాటకలో వర్షాభావం ఉంటే పశ్చిమ కనుమల్లో వర్షాలు తగ్గి కృష్ణా, గోదావరి నదులకు వరదలు తగ్గే అవకాశం ఉంది. దీంతో రాష్ట్రంలోని ప్రాజెక్టులు నిండక సాగునీటి సమస్యలు తలెత్తే ప్రమాదం ఉంది. ముఖ్యంగా ఉత్తర తెలంగాణ జిల్లాల్లో తీవ్రమైన వర్షపాతం లోటు, తూర్పు జిల్లాల్లో మధ్యస్థ లోటు ఉండవచ్చని అంచనా వేస్తున్నారు. దక్షిణ జిల్లాలపై ప్రభావం తక్కువగా ఉండొచ్చని అధికారులు తెలిపారు.