భీమారం మీదుగా బస్సు సౌకర్యం కల్పించాలని ఆర్టీసీ అధికారులకు వినతి

మంచిర్యాలలో రాష్ట్ర రోడ్డు రవాణా సంస్థ డిపో మేనేజర్‌ను భీమారం కాంగ్రెస్ నాయకులు మర్యాదపూర్వకంగా కలిశారు. మంత్రి వివేక్ వెంకటస్వామి అందజేసిన లేఖను డిపో మేనేజర్‌కు అందించారు. చెన్నూరు నుండి హైదరాబాద్ వెళ్లే 8188 లగ్జరీ బస్సుకు భీమారంలో బోర్డింగ్ పాయింట్ కల్పించాలని వారు వినతి చేశారు.

ఉదయం 7:00 గంటలకు చెన్నూరు నుండి మంచిర్యాల వరకు అంగరాజ్‌పల్లి, ఎర్రగుంటపల్లి ఎక్స్ రోడ్, గంగారం, కొత్తపల్లి, మద్దికల్, ఆరేపల్లి, భీమారం మీదుగా బస్సు సౌకర్యం కల్పించాలని, అలాగే సాయంత్రం 5:00 గంటలకు మంచిర్యాల నుండి చెన్నూర్‌కు అదే మార్గంలో బస్సు నడపాలని వినతి పత్రంలో కోరారు.

ఈ ప్రతిపాదనల వల్ల భీమారం మరియు చుట్టుపక్కల గ్రామాల ప్రజలకు రవాణా సౌకర్యం మెరుగుపడుతుందని నాయకులు తెలిపారు. స్థానిక ప్రజల అవసరాలను దృష్టిలో ఉంచుకొని ఈ మార్పులు చేయాలని వారు కోరారు.

డిపో మేనేజర్ సానుకూలంగా స్పందించారని, త్వరలోనే అవసరమైన చర్యలు తీసుకుంటామని హామీ ఇచ్చారని కాంగ్రెస్ నాయకులు వెల్లడించారు. ఈ హామీతో స్థానికులు సంతృప్తి వ్యక్తం చేశారు.