శ్రీరామనవమి సందర్భంగా భద్రాచలంలో సీతారాముల కళ్యాణ మహోత్సవం శుక్రవారం వైభవంగా జరగనుంది. ముఖ్యమంత్రి రేవంత్ రెడ్డి దంపతులు ఈ వేడుకల్లో పాల్గొని, రాములకు పట్టు వస్త్రాలు సమర్పించనున్నారు. ఆలయ అభివృద్ధికి కూడా సీఎం శ్రీకారం చుట్టనున్నారు.
శ్రీరామనవమి పర్వదినాన్ని పురస్కరించుకుని భద్రాచలంలో సీతారాముల కల్యాణం శుక్రవారం అట్టహాసంగా జరగనుంది. మిథిలా స్టేడియంలో ఏర్పాటు చేసిన కళ్యాణ వేదికపై ఈ మహోత్సవం నిర్వహించడానికి అన్ని ఏర్పాట్లు పూర్తయ్యాయి. తెలుగు రాష్ట్రాలతో పాటు దేశంలోని వివిధ ప్రాంతాల నుంచి భక్తులు ఈ వేడుకను తిలకించేందుకు భద్రాదికి తరలి వస్తున్నారు.
దక్షిణ అయోధ్యగా విలసిల్లుతున్న భద్రాచలంలో, శ్రీసీతారామ చంద్రస్వామి వారి దేవస్థానంలో కల్యాణ బ్రహ్మోత్సవాలు ఆధ్యాత్మిక శోభను సంతరించుకున్నాయి. సీతారాముల కల్యాణాన్ని భక్తిశ్రద్ధలతో, వైభవంగా నిర్వహించేందుకు అధికారులు విస్తృతంగా ఏర్పాట్లు చేశారు. భక్తకోటి కన్నులారా వీక్షించేందుకు పెద్ద సంఖ్యలో తరలివస్తున్నారు.
ఈ కళ్యాణ మహోత్సవానికి ముఖ్యమంత్రి రేవంత్ రెడ్డి దంపతులు హాజరై, రాములకు పట్టు వస్త్రాలు, ముత్యాల తలంబ్రాలు సమర్పించనున్నారు. ఈ వేడుకలకు దేశవ్యాప్తంగా భక్తులు తరలివస్తుండటంతో, పటిష్టమైన బందోబస్తు ఏర్పాట్లు చేశారు.
నవమి ఉత్సవాల్లో భాగంగా, ఆలయ పండితులు ఎదుర్కోలు ఉత్సవాన్ని అత్యంత వైభవంగా నిర్వహించారు. ఇది వివాహానికి ముందు జరిగే కీలక ఘట్టం, ఇందులో సీతారాముల పక్షాల వారు సంప్రదాయబద్ధంగా ఆచార వ్యవహారాలను నిర్వహిస్తారు. ముఖ్యమంత్రి రేవంత్ రెడ్డి ఉదయం 11 గంటలకు రామాలయ అభివృద్ధికి రూ.351 కోట్లతో మొదటి విడుత పనులకు శంకుస్థాపన చేయనున్నారు.
