నిర్మల్ జిల్లా బైంసా పట్టణంలో ఈ నెల 12వ తేదీన హిందూ సమ్మేళనం నిర్వహించనున్నట్లు నిర్వాహకులు తెలిపారు. ఈ కార్యక్రమం హిందూ సమాజ ఐక్యత, సంస్కృతి పరిరక్షణ, యువతలో ధార్మిక చైతన్యం పెంపొందించే లక్ష్యంతో జరుగుతోంది.
బైంసా పట్టణంలోని గణేష్ నగర్ బస్తిలో మున్నూరు కాపు సంఘం భవనంలో ఆదివారం ఉదయం 10 గంటలకు ఈ సమ్మేళనం జరగనుంది. హిందూ సమ్మేళన సమితి గణేష్ నగర్ బస్తి అధ్యక్షులు తోట రాము ఆధ్వర్యంలో ఈ కార్యక్రమానికి ఏర్పాట్లు జరుగుతున్నాయి.
సమ్మేళనంలో భాగంగా సామూహిక హనుమాన్ చాలీసా పారాయణం, ఆధ్యాత్మిక ప్రసంగాలు, ధార్మిక కార్యక్రమాలు నిర్వహించనున్నట్లు నిర్వాహకులు వెల్లడించారు. గోపాలకృష్ణ మఠం ఆదిలాబాద్కు చెందిన శ్రీశ్రీశ్రీ యోగానంద సరస్వతి మహాత స్వామీజీ ముఖ్య అతిథిగా హాజరుకానున్నారు.
రాష్ట్రీయ స్వయంసేవక్ సంఘ్ తెలంగాణ ప్రాంత కార్యవాహ శ్రీ కాచం రమేష్, విహెచ్పీ తెలంగాణ ప్రాంతానికి చెందిన శ్రీమతి సత్య శ్రీవాణి ఈ కార్యక్రమంలో వక్తలుగా పాల్గొని ధార్మిక, సామాజిక అంశాలపై ప్రసంగించనున్నారు. తెలంగాణ ప్రాంత మాతృశక్తి సహా సంయోజక్గా తోట రాము కార్యక్రమ నిర్వహణలో చురుగ్గా పాల్గొంటున్నారు.
స్థానిక భక్తులు, యువత, సేవా సంఘాల సహకారంతో ఏర్పాట్లు జరుగుతున్నాయి. ఈ సమ్మేళనం సమాజంలో ఐక్యత, ధార్మిక విలువలను పెంపొందించడానికి దోహదపడుతుందని నిర్వాహకులు ఆశాభావం వ్యక్తం చేశారు. గణేష్ నగర్, మహిష ప్రాంతాలతో పాటు పరిసర గ్రామాల ప్రజలు పెద్ద సంఖ్యలో పాల్గొనాలని ఆహ్వానం పంపారు.
