Nirmal/Nirmal Rural (మనోరంజని తెలుగు టైమ్స్) జూలై 11
బోథ్ మోడల్ స్కూల్ జూనియర్ కళాశాల వృక్షశాస్త్ర అధ్యాపకుడు, పర్యావరణ ప్రేమికుడు సందుక్వార్ ప్రవీణ్కుమార్, ప్రకృతిని దైవంగా భావిస్తూ వేలాది మొక్కలను నాటి సంరక్షిస్తున్నారు. భావితరాలకు పచ్చని భూమిని అందించాలనే సంకల్పంతో తెలంగాణ ప్రభుత్వం చేపడుతున్న హరితహారం లక్ష్యాలను తన ఆచరణలో ప్రతిబింబిస్తూ పర్యావరణ పరిరక్షణకు ఆదర్శంగా నిలుస్తున్నారు.
"మనిషి చెట్టును కాపాడితే.. చెట్టు మనిషి జీవితాన్ని కాపాడుతుంది." ఈ సందేశాన్ని తన జీవిత ధ్యేయంగా మలచుకున్నారు బోథ్ మోడల్ స్కూల్ జూనియర్ కళాశాల వృక్షశాస్త్ర అధ్యాపకుడు, పర్యావరణ ప్రేమికుడు సందుక్వార్ ప్రవీణ్కుమార్. ప్రకృతిని దైవంగా భావిస్తూ, చెట్లను జీవానికి మూలాధారంగా గుర్తించి, భావితరాలకు పచ్చని భూమిని అందించాలనే సంకల్పంతో వేలాది మొక్కలను నాటి సంరక్షిస్తున్నారు. తెలంగాణ ప్రభుత్వం చేపడుతున్న వనమహోత్సవం–హరితహారం లక్ష్యాలను ఎన్నో ఏళ్లుగా తన ఆచరణలో ప్రతిబింబిస్తూ పర్యావరణ పరిరక్షణకు ఆదర్శంగా నిలుస్తున్నారు.
2013 నుంచి 2024 వరకు కుంటాల మోడల్ స్కూల్లో వృక్షశాస్త్ర అధ్యాపకుడిగా విధులు నిర్వహించిన సమయంలో చెట్లు లేని పాఠశాల ప్రాంగణాన్ని వేలాది మొక్కలతో పచ్చని చిరు అడవిగా తీర్చిదిద్దారు. ప్రస్తుతం బోథ్ మోడల్ స్కూల్ జూనియర్ కళాశాలలోనూ అదే సేవాభావంతో హరితయజ్ఞాన్ని కొనసాగిస్తూ విద్యార్థుల్లో ప్రకృతి పట్ల ప్రేమను, పర్యావరణ బాధ్యతను పెంపొందిస్తున్నారు. మొక్కను నాటడమే కాదు, అది మహావృక్షంగా ఎదిగే వరకు సంరక్షించడమే నిజమైన ప్రకృతి సేవ అని ఆయన విశ్వసిస్తారు.
పాఠశాలలకే పరిమితం కాకుండా నిర్మల్ పట్టణంలోని గాయత్రి టౌన్షిప్లోని తన నివాస ప్రాంతంలోనూ వందలాది మొక్కలను నాటి పెంచుతున్నారు. ప్రతి సంవత్సరం తన పుట్టినరోజు, భార్య అన్నపూర్ణ, కుమార్తె సాత్విక పుట్టినరోజులు, వివాహ వార్షికోత్సవం, ప్రపంచ పర్యావరణ దినోత్సవం వంటి ప్రతి ప్రత్యేక సందర్భాన్ని హరితోత్సవంగా మార్చుకుని మొక్కలు నాటడం ఆయన కుటుంబ సంప్రదాయంగా మారింది. పాఠశాలకు వచ్చే అధికారులు, ప్రజాప్రతినిధులు, ప్రముఖుల చేత మొక్కలు నాటించి, వాటి సంరక్షణ బాధ్యతను కూడా స్వయంగా చేపట్టడం ఆయన ప్రత్యేకత.
చెట్లు మనిషికి ప్రాణవాయువును అందించే ప్రకృతి వరం. అవి కార్బన్ డయాక్సైడ్ను గ్రహించి ఆక్సిజన్ను విడుదల చేస్తాయి. భూగర్భ జలాలను పెంచుతాయి. వర్షాలకు అనుకూల వాతావరణాన్ని కల్పిస్తాయి. నేల కోతను నివారించి జీవవైవిధ్యాన్ని పరిరక్షిస్తాయి. పక్షులు, జంతువులకు ఆశ్రయంగా నిలుస్తాయి. పెరుగుతున్న ఉష్ణోగ్రతలను తగ్గించి ప్రకృతి సమతుల్యతను కాపాడతాయి. అందుకే ప్రతి కుటుంబం కనీసం ఒక మొక్కను నాటి దానిని చెట్టుగా పెంచాలని, మొక్కను నాటడం కంటే దానిని సంరక్షించడమే గొప్ప బాధ్యత అని ప్రవీణ్కుమార్ చెబుతున్నారు.
ఈ హరితయజ్ఞంలో ఆయనకు భార్య అన్నపూర్ణ (ఫారెస్ట్ సెక్షన్ ఆఫీసర్, మేడిపల్లి), కుమార్తె సాత్విక, తల్లిదండ్రులు అడుగడుగునా అండగా నిలుస్తున్నారు. కుటుంబ సభ్యుల సహకారంతో మొక్కల పెంపకాన్ని వారు జీవన విధానంగా మార్చుకున్నారు.
ప్రకృతి పరిరక్షణ ప్రభుత్వాల బాధ్యత మాత్రమే కాదని, ప్రతి పౌరుడి సామాజిక బాధ్యత అని ప్రవీణ్కుమార్ తన ఆచరణతో నిరూపిస్తున్నారు. డబ్బు, హోదా, ఆస్తులు కొంతకాలం మాత్రమే మనిషిని గుర్తుంచుతాయి. కానీ ఒక చెట్టు తరతరాల పాటు మనిషి సేవను సజీవంగా నిలబెడుతుంది. ఈ రోజు మనం నాటే ఒక చిన్న మొక్క రేపటి తరాలకు స్వచ్ఛమైన గాలి, చల్లని నీడ, ఆరోగ్యకరమైన జీవనాన్ని అందించే అమూల్యమైన కానుక. ప్రతి ఇంటి ముందు ఒక మొక్క, ప్రతి గ్రామంలో ఒక హరితవనం, ప్రతి మనసులో ప్రకృతిపై ప్రేమ ఉంటేనే పచ్చని తెలంగాణ, సురక్షితమైన భవిష్యత్తు సాకారం అవుతుంది.
