నిర్మల్ చిత్రసీమలో అడుగుపెట్టడం అభినందనీయం: వైస్ చైర్మన్ అప్పాల గణేష్ చక్రవర్తి

నిర్మల్ పట్టణం నుండి చలన చిత్ర నిర్మాతలు, దర్శకులుగా ఎదగడం హర్షదాయకమని నిర్మల్ మున్సిపల్ వైస్ చైర్మన్ అప్పాల గణేష్ చక్రవర్తి పేర్కొన్నారు. కొప్పుల క్రియేషన్స్ బ్యానర్‌పై 'ద ఎంప్టీ సీట్' సినిమా ప్రారంభోత్సవానికి ఆయన ముఖ్య అతిథిగా హాజరయ్యారు.

నిర్మల్ పట్టణంలోని చారిత్రాత్మక కోటలు, బురుజులు, గొలుసుకట్టు చెరువులు సినీ చిత్రీకరణకు ఎంతో ఆకట్టుకునే ప్రదేశాలని ఆయన తెలిపారు. జిల్లాలోని బాసర సరస్వతి ఆలయం, కుంటాల జలపాతం, కవ్వాల్ అభయారణ్యం, గోదావరి సహ్యాద్రి ప్రాంతాలు కూడా పర్యాటక, సినీ రంగాలకు అనుకూలమని ఆయన వివరించారు.

ఇటువంటి సుందరమైన ప్రాంతాలను చలన చిత్రాలలో చూపించడం ద్వారా స్థానిక పర్యాటక రంగం అభివృద్ధి చెందడమే కాకుండా, స్థానికులకు ఉపాధి అవకాశాలు మెరుగుపడతాయని గణేష్ చక్రవర్తి అభిప్రాయపడ్డారు.

చిత్ర పరిశ్రమలో తొలిసారిగా దర్శకులు, నిర్మాతలుగా అడుగుపెడుతున్న ద్యాగ స్వామి, కొప్పుల చిన్నయ్యలకు ఆయన శుభాకాంక్షలు తెలియజేశారు.