నిర్మల్ జిల్లా నూతన కలెక్టర్ భవేష్ మిశ్రాను సోమవారం ఎస్.టి.యు.టి.ఎస్. (STUTS) జిల్లా నాయకులు కలిసి పుష్పగుచ్ఛం అందజేసి శుభాకాంక్షలు తెలిపారు. ఈ సందర్భంగా ప్రభుత్వ పాఠశాలల బలోపేతం, విద్యా ప్రమాణాల మెరుగుదల, ఉపాధ్యాయుల సమస్యల పరిష్కారం వంటి అంశాలపై చర్చించారు.
ఎస్.టి.యు.టి.ఎస్. జిల్లా అధ్యక్షులు ఎస్. భూమన్న యాదవ్ మాట్లాడుతూ, జిల్లా విద్యా వ్యవస్థను మెరుగుపరిచేందుకు కలెక్టర్ ప్రత్యేక శ్రద్ధ వహించాలని విజ్ఞప్తి చేసినట్లు తెలిపారు. ఉపాధ్యాయుల సంక్షేమానికి, విద్యార్థుల నాణ్యమైన విద్యకు అన్ని విధాలా సహకరిస్తామని కలెక్టర్ హామీ ఇచ్చినట్లు ఆయన పేర్కొన్నారు.
ఇటీవల విడుదలైన ఎస్ఎస్సీ పరీక్షా ఫలితాలలో నిర్మల్ జిల్లా రాష్ట్ర స్థాయిలో మూడవ స్థానాన్ని సాధించడం పట్ల కలెక్టర్ భవేష్ మిశ్రా సంతోషం వ్యక్తం చేశారు. ఈ విజయం వెనుక విద్యాశాఖ అధికారులు, ఉపాధ్యాయులు, విద్యార్థుల సమిష్టి కృషి ఉందని ఆయన ప్రశంసించారు.
జిల్లాలో విద్యా వ్యవస్థను మరింత ఉన్నత స్థాయికి తీసుకెళ్లేందుకు అవసరమైన అన్ని చర్యలు తీసుకుంటామని కలెక్టర్ తెలిపారు. ఉపాధ్యాయుల సమస్యలను ఎప్పటికప్పుడు పరిష్కరిస్తూ, విద్యార్థులకు మెరుగైన విద్యా వాతావరణాన్ని కల్పించేందుకు కృషి చేస్తామని ఆయన భరోసా ఇచ్చారు.
ఈ సమావేశంలో ఎస్.టి.యు.టి.ఎస్. జిల్లా ప్రధాన కార్యదర్శి జె. లక్ష్మణ్, ఆర్థిక కార్యదర్శి బి. వెంకటేశ్వరరావు, హెడ్క్వార్టర్ కార్యదర్శి ఎం. శ్రీనివాస్, జిల్లా బాధ్యులు గంగాధర్, రాజమహేందర్, వివిధ మండలాల అధ్యక్ష, ప్రధాన కార్యదర్శులు పాల్గొన్నారు.
