వనపర్తి, 2026-08-09
వనపర్తి జిల్లా మదనాపురం మండలంలో చేపల వేటకు వెళ్లిన యువకుడిపై మొసలి దాడి చేసి తీవ్రంగా గాయపరిచింది. గోపన్ పేట గ్రామ సమీపంలోని రామన్ పాడు బ్రిడ్జి బ్యాక్ వాటర్ నది వద్ద ఈ ఘటన చోటుచేసుకుంది. బాధితుడిని మెరుగైన వైద్యం కోసం జిల్లా ఆసుపత్రికి తరలించారు.
వనపర్తి జిల్లా మదనాపురం మండలంలోని గోపన్ పేట గ్రామ సమీపంలో రామన్ పాడు బ్రిడ్జి బ్యాక్ వాటర్ నది వద్ద చేపల వేటకు వెళ్లిన మత్స్యకారుడు మహేష్ (30) పై మొసలి దాడి చేసి గాయపరిచింది. ఒడ్డు అంచుకు వచ్చిన మొసలి అతడిని కరవడంతో మహేష్కు తీవ్ర గాయాలయ్యాయి. స్థానిక మత్స్యకారులు వెంటనే అతడిని ప్రభుత్వ ఆసుపత్రికి తరలించి చికిత్స అందించారు. అనంతరం మెరుగైన వైద్యం కోసం అక్కడి వైద్యులు జిల్లా ఆసుపత్రికి తరలించారు.
నదిలో మొసళ్ల సంచారంపై హెచ్చరిక
జోగులాంబ గద్వాల జిల్లా ఎర్రవల్లి మండలంలో ఎగువన కురుస్తున్న వర్షాల కారణంగా జూరాల ప్రాజెక్టుకు నీటి ప్రవాహం పెరిగింది. దీంతో గత వారం రోజులుగా బీచుపల్లి వద్ద కృష్ణా నది ఉధృతంగా ప్రవహిస్తోంది. ఈ నేపథ్యంలో, పైనుండి వచ్చిన ప్రాణాంతకమైన మొసళ్లు (క్రొకోడైల్) నీటి ప్రవాహంలో కొట్టుకొచ్చాయి. పర్యాటకులు, మత్స్యకారులు, ప్రజలు నది ఒడ్డున స్నానాలు ఆచరించేటప్పుడు, బహిర్భూమికి వెళ్లేటప్పుడు, వేటకు వెళ్లేటప్పుడు అప్రమత్తంగా ఉండాలని అధికారులు హెచ్చరించారు.
అధికారుల సూచనలు
నదిలోకి వెళ్లేవారు సమీపంలో ఉన్న మత్స్యకారుల సలహాలు, సూచనల మేరకు నదిలోకి వెళ్లాలని కోరారు. ఈ మేరకు జిల్లా కలెక్టర్, అలంపూర్ సీఐ ప్రదీప్, ఇటిక్యాల ఎస్ఐ రవి, ఎమ్మార్వో నరేష్, ఎంపీడీవో, పంచాయత్ సెక్రటరీ అరుణతో పాటు ఇతర అధికారులు ప్రజలకు ఈ విషయాన్ని తెలియజేశారు. నది పరిసరాల్లో అప్రమత్తతతో ఉండాలని సూచించారు.
