నకిలీ వాహన పత్రాలతో రిజిస్ట్రేషన్ పొందేందుకు ప్రయత్నించిన ముగ్గురు వ్యక్తులను బోథ్ పోలీసులు అరెస్ట్ చేసి రిమాండ్కు తరలించారు. ఈ వ్యవహారంలో వాహన నంబర్లు, ఛాసిస్, ఇంజిన్ నంబర్లను ఫోర్జరీ చేసినట్లు డీఎస్పీ ఎల్. జీవన్ రెడ్డి తెలిపారు.
బోథ్ కోరమాండల్ జంక్షన్ వద్ద వాహన తనిఖీలు నిర్వహిస్తున్న సమయంలో అనుమానాస్పదంగా కనిపించిన ఒక మహీంద్రా మ్యాక్స్ వాహనాన్ని పోలీసులు ఆపారు. వాహన తనిఖీలో ఛాసిస్, ఇంజిన్ నంబర్లలో మార్పులు చేసినట్లు గుర్తించారు. వాహన డ్రైవర్ ఎస్.కె. నయీమ్ (37) విచారణలో, మహారాష్ట్రలోని లాతూర్ ప్రాంతం నుంచి వాహనం కొనుగోలు చేసినట్లు, సరైన పత్రాలు లేకపోవడంతో నకిలీ రిజిస్ట్రేషన్కు ప్రయత్నించినట్లు అంగీకరించాడు.
విచారణలో, మాకునూర్ విజయ్ కుమార్ అనే వ్యక్తి వాహన ఛాసిస్, ఇంజిన్ నంబర్లను తొలగించి, తిరిగి చెక్కడం ద్వారా ఫోర్జరీకి సహకరించినట్లు తెలిసింది. అలాగే, స్క్రాప్కు వెళ్లిన ఏపీ 23 జె 1036 వాహనానికి సంబంధించిన పత్రాలను పెందూర్ ఇంద్రు నుంచి రూ.10,000కు కొనుగోలు చేసి నకిలీగా ఉపయోగించినట్లు పోలీసులు గుర్తించారు.
ఈ ఘటనపై బోథ్ పోలీస్ స్టేషన్లో కేసు నమోదు చేసి దర్యాప్తు కొనసాగిస్తున్నారు. నిందితులు ప్రభుత్వ అధికారులను మోసం చేయడం, నకిలీ పత్రాలు తయారు చేయడం, వాహన వివరాల్లో మార్పులు చేయడం వంటి నేరాలకు పాల్పడినట్లు పోలీసులు తెలిపారు.
ప్రజలు వాహనాలు కొనుగోలు చేసే సమయంలో ఛాసిస్ నంబర్లు, ఇంజిన్ నంబర్లు, అసలు రిజిస్ట్రేషన్ పత్రాలను తప్పనిసరిగా సరిచూసుకోవాలని, నకిలీ పత్రాలతో వాహనాలు కొనుగోలు చేస్తే తీవ్ర నష్టం వాటిల్లుతుందని పోలీసులు హెచ్చరించారు.
