కుటుంబ కలహాల నేపథ్యంలో కన్నతల్లే తన ఇద్దరు పిల్లలకు బిస్కెట్లలో ఎలుకల మందు కలిపి తినిపించి హత్య చేసిన దారుణం ఖమ్మం నగరంలో చోటుచేసుకుంది. చికిత్స పొందుతూ ఇద్దరు చిన్నారులు మృతి చెందారు.
ఖమ్మం నగరంలో జరిగిన ఈ విషాదకర సంఘటన స్థానికంగా తీవ్ర కలకలం రేపింది. లింగరాజు-స్వాతి దంపతులకు ఆరు, ఐదు సంవత్సరాల వయసున్న ఇద్దరు కుమారులు ఉన్నారు. వీరి స్వగ్రామం ఏదులాపురం మున్సిపాలిటీలోని గుర్రాలపాడు అయినప్పటికీ, గత రెండేళ్లుగా వీరు ఖమ్మం నగరంలో నివాసం ఉంటున్నారు.
కుటుంబ సభ్యుల మధ్య, ముఖ్యంగా సొంత గ్రామానికి వెళ్లాలనే విషయంలో భార్యాభర్తల మధ్య విభేదాలు తలెత్తినట్లు తెలుస్తోంది. ఈ నేపథ్యంలోనే తల్లి స్వాతి ఈ ఘోరానికి ఒడిగట్టిందని స్థానికులు ఆరోపిస్తున్నారు. నిన్న భర్త ఇంట్లో లేని సమయంలో, పిల్లలకు తినిపించే బిస్కెట్లలో ఎలుకల మందు కలిపి ఇచ్చినట్లు సమాచారం.
మందు కలిపిన బిస్కెట్లు తిన్న పిల్లలు అస్వస్థతకు గురికావడంతో, వారిని వెంటనే ఆసుపత్రికి తరలించారు. అయితే, వైద్యులు ఎంత ప్రయత్నించినా ఫలితం లేకపోయింది. చికిత్స పొందుతూ ఇద్దరు పిల్లలు ప్రాణాలు కోల్పోయారు.
ఈ దారుణ ఘటనపై సమాచారం అందుకున్న పోలీసులు వెంటనే సంఘటనా స్థలానికి చేరుకుని విచారణ చేపట్టారు. కుటుంబ కలహాల నేపథ్యంలోనే ఈ హత్య జరిగిందా లేక మరేదైనా కారణాలున్నాయా అనే కోణంలో పోలీసులు దర్యాప్తు చేస్తున్నారు. మృతదేహాలను పోస్టుమార్టం నిమిత్తం తరలించారు.
