నిజామాబాద్ జిల్లా అర్ముర్ మండలంలోని అంకాపూర్ గ్రామంలో జరుగుతున్న 25 రోజుల అధర్వవేద పారాయణ మహా యజ్ఞం ఆధ్యాత్మిక వాతావరణంలో కొనసాగుతోంది. ఈ యజ్ఞం మానసిక పరిపక్వతను పెంచడంతో పాటు, అనేక ఇతర ప్రయోజనాలను అందిస్తుందని వేద విద్వాంసులు తెలిపారు.
ఫిబ్రవరి 12న ప్రారంభమైన ఈ మహా యజ్ఞం మార్చి 8న పూర్ణాహుతితో ముగియనుంది. మంగళవారం జరిగిన కార్యక్రమంలో ఆచార్య శ్రీధరానంద భారతి స్వామి, ఆచార్య వేద పునీతానంద భారతి స్వామి ఆధ్వర్యంలో అధర్వవేద పారాయణ మహా యజ్ఞాలు శాస్త్రోక్తంగా నిర్వహించారు. అనంతరం భక్తులను ఉద్దేశించి స్వాములు ప్రవచనం చేశారు.
యజ్ఞం ఆత్మశుద్ధికి, కోరికల సాధనకు దోహదపడుతుందని, పాపాలను నశింపజేసి మానసిక పరిపక్వతను పెంచుతుందని స్వాములు పేర్కొన్నారు. ఇంట్లో సానుకూల వాతావరణాన్ని నెలకొల్పడంతో పాటు, ప్రతికూల శక్తులను దూరం చేస్తుందని వివరించారు. యజ్ఞంలో వినియోగించే మూలికలు, నెయ్యితో వెలువడే పొగ వాతావరణంలోని కీటకాలు, బ్యాక్టీరియాలను తగ్గించడంలో సహాయపడుతుందని తెలిపారు.
కొన్ని అనారోగ్య సమస్యలు కూడా తగ్గుతాయని, జాతకంలో గ్రహస్థితులు అనుకూలంగా లేనప్పుడు యజ్ఞం ద్వారా దోషాలను తగ్గించుకోవచ్చని విశ్వాసం వ్యక్తం చేశారు. యజ్ఞం శాస్త్రీయంగా, ఆధ్యాత్మికంగా పవిత్రమైన ప్రక్రియ అని, నిష్ఠతో ఆచరించినప్పుడే సంపూర్ణ ఫలితాలు లభిస్తాయని పేర్కొన్నారు.
కామ, క్రోధ, మద, మాత్సర్యాలను జయించి నియమబద్ధంగా కర్మాచరణ చేయడమే సంశిత యజ్ఞమని వివరించారు. ప్రాచీన గ్రంథాల ప్రకారం, యజ్ఞాలు మానవుడు-దైవం మధ్య వారధిగా, అగ్ని భౌతిక, దైవిక లోకాల మధ్య మధ్యవర్తిగా పనిచేస్తుందని తెలిపారు. అగ్నిలో సమర్పించే నైవేద్యాలు నిస్వార్థ సేవకు ప్రతీక అని, విశ్వసమతుల్యత, సామరస్యాన్ని కాపాడటంలో యజ్ఞాలకు ప్రత్యేక స్థానం ఉందని, ఇవి హిందూ సంస్కృతి, చరిత్రలో అంతర్భాగమని స్వాములు అభిప్రాయపడ్డారు.
