రాష్ట్రంలోని న్యాయవాదుల సంఘాల ఎన్నికల సందర్భంగా జరిగిన ప్రలోభాలు, నగదు పంపిణీ, కుల ప్రాతిపదికన ప్రచారం వంటి ఆరోపణలు న్యాయవాద వృత్తి గౌరవాన్ని దెబ్బతీస్తున్నాయని పలువురు సీనియర్ న్యాయవాదులు, క్లయింట్లు ఆవేదన వ్యక్తం చేశారు.
కొన్ని వర్గాల నుంచి వెల్లువెత్తిన ఆరోపణల ప్రకారం, ఎన్నికల సందర్భంగా కొందరు అభ్యర్థులు ఓట్ల కోసం కానుకలు, నగదు, ఇతర ప్రలోభాలకు పాల్పడ్డారు. న్యాయవాద వృత్తి సమాజానికి ఆదర్శంగా నిలవాల్సిన సందర్భంలో ఇలాంటి ఘటనలు చోటుచేసుకోవడం బాధాకరమని పలువురు అభిప్రాయపడ్డారు. “వృత్తి గౌరవం కాపాడాల్సిన న్యాయవాదులే ప్రలోభాలకు లోనవుతుండటం సమాజానికి సరైన సంకేతం కాదు” అని కొందరు వ్యాఖ్యానించారు.
ఎన్నికల ప్రక్రియను ప్రత్యక్షంగా గమనించిన కొందరు క్లయింట్లు కూడా తమ న్యాయవాదుల ప్రవర్తనపై నిరాశ వ్యక్తం చేసినట్లు సమాచారం. కొందరు అభ్యర్థులు కుల ఆధారంగా ప్రచారం చేయగా, మరికొందరు నేరుగా నోట్ల కట్టలతో ఓటర్లను ఆకర్షించడానికి ప్రయత్నించారనే ఆరోపణలు వినిపిస్తున్నాయి. ఈ నేపథ్యంలో ఎన్నికల పారదర్శకతపై ప్రశ్నలు తలెత్తుతున్నాయి.
ఓటు హక్కు విలువను కాపాడుకోవాల్సిన న్యాయవాదులు స్వయంగా ప్రలోభాలకు లోనవడం వృత్తి నైతికతను దెబ్బతీస్తోందని విమర్శలు వెల్లువెత్తుతున్నాయి. అలాగే, కార్పొరేట్ న్యాయవాద సంఘాలు న్యాయవాదుల సంక్షేమం, భవిష్యత్ సమస్యలపై ఇచ్చిన హామీలు కేవలం మాటలకే పరిమితమయ్యాయనే అభిప్రాయాలు వ్యక్తమవుతున్నాయి. “ఇలాంటి పరిస్థితుల్లో క్లయింట్లు తమ కేసుల భవిష్యత్తుపై ఎలా నమ్మకం పెట్టుకోవాలి?” అనే ప్రశ్నలు ఉత్పన్నమవుతున్నాయి.
అయితే, ఈ పరిస్థితుల్లోనూ కొందరు న్యాయవాదులు ప్రలోభాలకు లొంగకుండా నైతిక విలువలను పాటిస్తూ స్వచ్ఛమైన ఓటును నమోదు చేసినట్లు సమాచారం. ఇలాంటి న్యాయవాదులే వృత్తి గౌరవాన్ని కాపాడగలరని పలువురు అభిప్రాయపడ్డారు. సామాజిక స్పృహ గల న్యాయవాది మేడా శ్రీనివాస్, న్యాయవాదులు తమ బాధ్యతను గుర్తించి రాజ్యాంగ విలువలను కాపాడాలని పిలుపునిచ్చారు.
