ప్రజాపాలన ప్రగతి ప్రణాళికలో భాగంగా ఆదిలాబాద్లో నిర్వహించిన ఐదు కిలోమీటర్ల మారథాన్ పోటీలు యువత ఆరోగ్యంపై ప్రత్యేక దృష్టి సారించాల్సిన ఆవశ్యకతను చాటి చెప్పాయి. ఈ కార్యక్రమంలో అదనపు కలెక్టర్ రాజేశ్వర్, మున్సిపల్ చైర్పర్సన్ బండారి అనూష పాల్గొన్నారు.
సోమవారం ఇందిరా ప్రియదర్శిని స్టేడియం నుంచి ప్రారంభమైన ఈ మారథాన్, పట్టణంలోని ప్రధాన రహదారుల మీదుగా సాగింది. ఈ పరుగు పోటీలో ఉద్యోగులు, యువత, వివిధ వర్గాల ప్రజలు, పట్టణ ప్రముఖులు ఉత్సాహంగా పాల్గొన్నారు. విజేతలకు పతకాలు, ప్రశంస పత్రాలు అందజేసి అభినందించారు.
ఈ సందర్భంగా అదనపు కలెక్టర్ రాజేశ్వర్ మాట్లాడుతూ, ప్రజలు తమ నిత్య జీవితంలో యోగ, ధ్యానాన్ని భాగస్వామ్యం చేసుకోవాలని సూచించారు. రాష్ట్ర ప్రభుత్వం ప్రజల ఆరోగ్య పరిరక్షణ కోసం ప్రత్యేక కార్యక్రమాలు చేపడుతోందని, ప్రజాపాలన ప్రగతి ప్రణాళికలో భాగంగా జిల్లాలో వివిధ అభివృద్ధి, సంక్షేమ కార్యక్రమాలు నిర్వహిస్తున్నామని తెలిపారు.
ఆరోగ్యవంతమైన సమాజ నిర్మాణానికి ప్రతి ఒక్కరూ శారీరక వ్యాయామం, యోగ, ధ్యానం అలవాటు చేసుకోవాలని ఆయన నొక్కి చెప్పారు. ఈ మారథాన్ ప్రజల్లో ఆరోగ్య స్పృహను పెంచే దిశగా దోహదపడింది.
ఈ కార్యక్రమంలో మార్కెట్ కమిటీ చైర్మన్ బోరంచు శ్రీకాంత్ రెడ్డి, జిల్లా యువజన క్రీడల అధికారి జక్కుల శ్రీనివాస్, జిల్లా గ్రామీణాభివృద్ధి అధికారి రాథోడ్ రవీందర్, జిల్లా పంచాయతీ అధికారి రమేష్, సంక్షేమ అధికారి మిల్కా, గిరిజన క్రీడల అభివృద్ధి అధికారి పార్థసారథి, క్రీడా శిక్షకులు, అధికారులు, యువత, ఉద్యోగులు, తెలంగాణ సాంస్కృతిక సారథి కళాకారులు తదితరులు పాల్గొన్నారు.
