ముధోల్ నియోజకవర్గ అభివృద్ధి, రైతుల సమస్యలపై కలెక్టర్‌తో ఎమ్మెల్యే భేటీ

నిర్మల్ జిల్లా నూతన కలెక్టర్‌గా బాధ్యతలు స్వీకరించిన భవేష్ మిశ్రా (ఐఏఎస్)ను ముధోల్ శాసనసభ్యులు పవార్ రామారావు పటేల్ మర్యాదపూర్వకంగా భేటీ అయ్యారు. ఈ సందర్భంగా ముధోల్ నియోజకవర్గంలో కొనసాగుతున్న అభివృద్ధి కార్యక్రమాలు, ప్రజా సమస్యలు, సంక్షేమ పథకాల అమలు తదితర అంశాలపై విస్తృతంగా చర్చించారు.

నియోజకవర్గానికి సంబంధించిన పలు ముఖ్య సమస్యలను ఎమ్మెల్యే కలెక్టర్ దృష్టికి తీసుకెళ్లారు. కలెక్టర్ భవేష్ మిశ్రా ఎమ్మెల్యే లేవనెత్తిన అంశాలపై సానుకూలంగా స్పందించినట్లు, తగిన చర్యలు తీసుకుంటామని హామీ ఇచ్చినట్లు సమాచారం.

రైతులు పండించిన పంటలను విక్రయించుకునేందుకు ఏర్పాటు చేసిన కొనుగోలు కేంద్రాలు, సబ్ సెంటర్లలో గన్నీ బ్యాగులు, రవాణా వాహనాల కొరత కారణంగా ఎదురవుతున్న ఇబ్బందులను ఎమ్మెల్యే ప్రస్తావించారు. రైతులకు ఎలాంటి ఇబ్బందులు లేకుండా చర్యలు తీసుకోవాలని ఆయన కోరారు.

ముధోల్ నియోజకవర్గ అభివృద్ధి కోసం పరస్పర సహకారంతో పనిచేయాలని ఈ సందర్భంగా ఇరువురు నిర్ణయించుకున్నారు. ఈ భేటీ నియోజకవర్గ అభివృద్ధికి దోహదపడుతుందని భావిస్తున్నారు.