భారతదేశ విప్లవ చరిత్రలో ఏప్రిల్ 22 ఒక కీలక మలుపు అని సీపీఐ (ఎంఎల్) మాస్ లైన్ ప్రజాపంథా నిర్మల్ జిల్లా కార్యదర్శి కే. రాజన్న పేర్కొన్నారు. నిర్మల్ జిల్లా కేంద్రంలో నిర్వహించిన లెనిన్ జయంతి, సీపీఐ (ఎంఎల్) ఆవిర్భావ దినోత్సవ సభలో ఆయన ఈ వ్యాఖ్యలు చేశారు.
నిర్మల్ జిల్లా కేంద్రంలో సీపీఐ (ఎంఎల్) మాస్ లైన్ ప్రజాపంథా ఆధ్వర్యంలో మార్క్సిస్టు మహోపాధ్యాయుడు లెనిన్ జయంతి, సీపీఐ (ఎంఎల్) ఆవిర్భావ దినోత్సవ సభను ఏప్రిల్ 22, 2026న నిర్వహించారు. ఈ సందర్భంగా లెనిన్ చిత్రపటానికి పూలమాలలు వేసి నివాళులర్పించారు.
జిల్లా కార్యదర్శి కే. రాజన్న మాట్లాడుతూ, ఏప్రిల్ 22న రివిజనిజం, నయా రివిజనిజంను ఎదుర్కొంటూ విప్లవ శక్తులు సీపీఐ (ఎంఎల్) పార్టీగా ప్రకటించుకున్నాయని తెలిపారు. మార్క్సిజం-లెనినిజం-మావో ఆలోచనా విధానాన్ని తమ విధానంగా స్వీకరించిన రోజు అని, వ్యవసాయ విప్లవాన్ని కేంద్రంగా నూతన ప్రజాస్వామిక విప్లవానికి నాంది పలికిన రోజు అని ఆయన వివరించారు.
దేశాన్ని అర్ధ వలస, అర్ధ భూస్వామ్య వ్యవస్థగా వర్గీకరించిన రోజుగానూ, ఎన్నికలు, చట్టసభలను తిరస్కరించి సాయుధ పోరాటాన్ని ప్రధాన మార్గంగా ఎంచుకున్న రోజుగానూ దీనిని అభివర్ణించారు. భూస్వామ్య పెట్టుబడిదారులు, సామ్రాజ్యవాదం, వారికి మద్దతు ఇచ్చే పాలకులను శత్రువులుగా ప్రకటించిన రోజు అని రాజన్న పేర్కొన్నారు.
ప్రథమ సోషలిస్టు వ్యవస్థ నిర్మాత, పీడిత ప్రజల నాయకుడు లెనిన్ పుట్టినరోజు కూడా ఇదేనని, కామ్రేడ్ లెనిన్ ఆశయాల సాధనకు కృషి చేయాలని ఆయన పిలుపునిచ్చారు.
