బైంసా మండలం తిమ్మాపూర్ గ్రామంలో ఛత్రపతి శివాజీ మహారాజ్ విగ్రహ ప్రతిష్టాపన మహోత్సవం ఆదివారం ఘనంగా జరిగింది. ఈ కార్యక్రమంలో ముఖ్య అతిథిగా హాజరైన ప్రజా ట్రస్ట్ చైర్మన్ భోస్లె మోహన్రావు పటిల్, యువత శివాజీ మార్గంలో నడవాలని, ఆయన జీవితం దేశభక్తికి ప్రతీక అని పేర్కొన్నారు.
తిమ్మాపూర్ గ్రామంలో జరిగిన ఈ ప్రతిష్టాపన మహోత్సవానికి గ్రామస్థులు అధిక సంఖ్యలో తరలివచ్చారు. ముఖ్య అతిథి మోహన్రావు పటిల్ విగ్రహానికి పూలమాలలు సమర్పించి, శివాజీ మహారాజ్ స్ఫూర్తిని కొనియాడారు.
సభలో మోహన్రావు పటిల్ మాట్లాడుతూ, శివాజీ మహారాజ్ చూపిన మార్గం యువతకు ప్రేరణగా నిలవాలని, సమాజ నిర్మాణంలో చురుగ్గా పాల్గొనాలని పిలుపునిచ్చారు. ఆయన పరిపాలనా నైపుణ్యాలు, ధైర్యసాహసాలు నేటి యువతకు ఆదర్శమని అన్నారు.
దేశసేవ భావనతో సమాజానికి సేవ చేయాలని, గ్రామాల్లో ఐక్యత, సాంస్కృతిక విలువలను పరిరక్షించాలని సూచించారు. శివాజీ మహారాజ్ చరిత్రను తెలుసుకొని, ఆచరించడం ద్వారా యువత తమ జీవితాలను సార్థకం చేసుకోవచ్చని పేర్కొన్నారు.
ఈ కార్యక్రమంలో ముధోల్ మాజీ ఎంపీపీ సుభాష్ పటిల్, గవర్నమెంట్ డిగ్రీ కాలేజీ డెవలప్మెంట్ మెంబర్ మనోజ్ పాపిన్వార్ తో పాటు పలువురు స్థానిక నాయకులు, గ్రామ పెద్దలు, మహిళలు, యువకులు పాల్గొన్నారు.