ప్రపంచ ప్రఖ్యాత మోటార్సైకిల్ బ్రాండ్ రాయల్ ఎన్ఫీల్డ్, ఆంధ్రప్రదేశ్లో రూ.2,200 కోట్ల పెట్టుబడితో అతిపెద్ద తయారీ కేంద్రాన్ని ఏర్పాటు చేయనుంది. తిరుపతి జిల్లా సత్యవేడు ప్రాంతంలో ఈ మెగా ప్లాంట్ రానుంది, ఇది రాష్ట్ర పారిశ్రామిక రంగానికి గణనీయమైన ఊపునిస్తుందని భావిస్తున్నారు.
ప్రపంచవ్యాప్తంగా గుర్తింపు పొందిన రాయల్ ఎన్ఫీల్డ్, తన తయారీ సామర్థ్యాన్ని విస్తరించుకోవడానికి ఆంధ్రప్రదేశ్ను ఎంచుకుంది. 1901లో సంస్థ ఆవిర్భవించిన తర్వాత తమిళనాడు వెలుపల ఇంత పెద్ద స్థాయిలో తయారీ యూనిట్ ఏర్పాటు చేయడం ఇదే తొలిసారి.
రాష్ట్ర పెట్టుబడుల ప్రోత్సాహక మండలి (SIPB) ఈ ప్రతిష్టాత్మక ప్రాజెక్టుకు అధికారిక ఆమోదం తెలిపింది. ఈ ప్లాంట్ ద్వారా రాయల్ ఎన్ఫీల్డ్ వార్షిక ఉత్పత్తి సామర్థ్యం దాదాపు 9 లక్షల యూనిట్లు పెరగనుంది. ఇది దేశీయ మార్కెట్తో పాటు అంతర్జాతీయ ఎగుమతులలో కూడా సంస్థ మరింత దూసుకెళ్లేందుకు దోహదపడుతుంది.
ప్రాజెక్టు కోసం సత్యవేడు మండలంలోని వన్నెలూరు, రాళ్ళకుప్పం గ్రామాల్లో మొత్తం 267 ఎకరాల భూమిని ప్రభుత్వం కేటాయించింది. ఈ పరిశ్రమ ద్వారా ప్రత్యక్షంగా, పరోక్షంగా సుమారు 5 వేల మందికి ఉపాధి అవకాశాలు లభించనున్నాయి.
మొదటి దశలో ప్రధాన తయారీ యూనిట్తో పాటు ప్రత్యేక వెండర్ పార్క్ను కూడా అభివృద్ధి చేయాలని ప్రణాళిక రూపొందించారు. దీనివల్ల రాయల్ ఎన్ఫీల్డ్కు అనుబంధంగా ఉన్న సరఫరాదారులు, భాగాల తయారీ సంస్థలు కూడా ఏపీకి తరలివచ్చే అవకాశముంది. సత్యవేడు ప్రాంతం భవిష్యత్తులో ప్రపంచ స్థాయి ఆటోమొబైల్ తయారీ క్లస్టర్గా రూపుదిద్దుకునే అవకాశం ఉందని పరిశ్రమ వర్గాలు భావిస్తున్నాయి. ప్రాజెక్టు తొలి దశను 2029 నాటికి, రెండో దశను 2032 నాటికి పూర్తి చేయాలని లక్ష్యంగా పెట్టుకున్నారు.
