నిజామాబాద్ కంఠేశ్వరాలయంలో పులి వేట వీరగల్లు శిల్పం గుర్తింపు

కొత్త తెలంగాణ చరిత్ర బృందం రాష్ట్ర కన్వీనర్ శ్రీరామోజు హరగోపాల్ మాట్లాడుతూ, ఈ పులి వేట వీరగల్లు శిల్పానికి శాసనం లేనప్పటికీ, వీరుడు ధరించిన ఆహార్యాన్ని బట్టి ఇది ఎర్లీ కళ్యాణి చాళుక్యుల కాలానికి చెందినదని తెలిపారు. వీరుడు కుడివైపు సిగ, చెవులకు కుండలాలు, హారాలు, గ్రైవేయకాలు, దండికడియాలు, వీరకాసె, ఎడమ కాలికి అందె ధరించినట్లు వివరించారు. కుడి చేతిలో బాకు, ఎడమ చేతిలో విల్లు పట్టుకున్న మీసాల వీరుడు, ఒకే పులి వీరుని ఎడమ పిడికిలి నోటితో కరిచి పట్టుకున్నట్లు, వెనుక కాళ్లపై నిలబడి దాడి చేస్తున్నట్లుగా ఈ శిల్పం చెక్కబడిందని పేర్కొన్నారు.

చరిత్రకారుడు కంకణాల రాజేశ్వర్ మాట్లాడుతూ, కంఠేశ్వర్ ప్రాంతంలో స్వయంభూ శివలింగంతో వెలసిన శివాలయం గురించి వివరించారు. ఈ ఆలయాన్ని 1వ శతాబ్దంలో శాతవాహన రాజు రెండవ శాతకర్ణి జైనుల కోసం నిర్మించారని, కాలక్రమేణా కాకతీయుల కాలంలో దీనిని శివాలయంగా మార్చారని తెలిపారు. ప్రధాన ఆలయంలోని నందీశ్వరుడు ప్రత్యేక ఆకర్షణగా నిలుస్తాడని, బ్రహ్మ, విష్ణు, మహేశ్వరుల స్వరూపాలు ఇక్కడ దర్శనమిస్తాయని పేర్కొన్నారు.

ఆలయ ప్రాంగణంలో ఉత్తరాన కోనేరు, రథశాలలతో పాటు వినాయకుడు, సుబ్రహ్మణ్యస్వామి, పార్వతీదేవి ఉపాలయాలు ఉన్నాయని, దక్షిణ దిశగా దాసాంజనేయ స్వామి, సంతాన నాగేంద్రుడు, శివ ధ్యాన మందిరం, నవగ్రహాలయం, పంచవటి వృక్షం కొలువై ఉన్నాయని రాజేశ్వర్ తెలిపారు. స్వయంభూ శివలింగంతో పాటు విష్ణువు నాభి నుంచి ఉద్భవించిన బ్రహ్మ ఉండటంతో ఈ ఆలయం నీలకంఠేశ్వరాలయంగా విరాజిల్లుతోందని, సుమారు మూడు ఎకరాల విస్తీర్ణంలో 100 అడుగుల ముఖద్వారంతో ఈ నిర్మాణం ఉత్తర భారతీయ శైలిలో ఉందని, రెండు వేల సంవత్సరాల ఘన చరిత్ర కలిగిన ఈ ఆలయం కారణంగానే ఈ ప్రాంతానికి కంఠేశ్వర్ అని పేరు వచ్చిందని ఆయన వివరించారు.

ఈ క్షేత్ర సందర్శనలో భీంగల్ పట్టణ సర్వసమాజ్ అభివృద్ధి కమిటీ ఉపాధ్యక్షుడు తీగల రఘు కూడా పాల్గొన్నారు. ఈ పర్యటన చారిత్రక ఆనవాళ్లను వెలుగులోకి తీసుకురావడంలో కీలక పాత్ర పోషించింది.