మెండోర మండలంలోని దూదిగాం గ్రామంలోని సిఎస్ఐ దేవాలయంలో గుడ్ ఫ్రైడే (శుభ శుక్రవారం) సందర్భంగా ప్రత్యేక ప్రార్థనలు భక్తి శ్రద్ధలతో నిర్వహించారు. ఈ సందర్భంగా క్రైస్తవ భక్తులు పెద్ద సంఖ్యలో హాజరై ప్రార్థనలు చేశారు.
స్థానిక చర్చి పాస్టర్ రెవరెండ్ ఎం. ప్రసాద్ ఆధ్వర్యంలో జరిగిన ఈ కార్యక్రమంలో, యేసు క్రీస్తు సిలువపై పలికిన ఏడు మాటల ఆధ్యాత్మిక భావాన్ని పాస్టర్లు, సంఘ నాయకులు భక్తులకు వివరించారు.
పాస్టర్లు మాట్లాడుతూ, మానవాళి రక్షణ కోసం యేసు క్రీస్తు సిలువపై తన ప్రాణాలను అర్పించిన మహత్యాన్ని గుర్తుచేశారు. ప్రేమ, క్షమ, త్యాగం అనే సందేశాలను జీవితంలో ఆచరించాలని భక్తులకు సూచించారు.
ప్రార్థనల అనంతరం భక్తులు నిశ్శబ్ద ధ్యానం చేసి యేసు క్రీస్తు త్యాగాన్ని స్మరించుకున్నారు. ఈ కార్యక్రమంలో స్థానిక పాస్టర్లు, సంఘ నాయకులు, క్రైస్తవ భక్తులు పెద్ద సంఖ్యలో పాల్గొన్నారు.
