నిర్మల్ జిల్లాలో కాకతీయ కాలం నాటి ఉమామహేశ్వర విగ్రహాల గుర్తింపు

ప్రముఖ కవి, చరిత్ర పరిశోధకుడు డా. తుమ్మల దేవరావు తెలిపిన వివరాల ప్రకారం, ఈ విగ్రహాలు సుమారు క్రీ.శ. 10వ నుండి 11వ శతాబ్దాల మధ్యకాలానికి చెందినవిగా అంచనా వేస్తున్నారు. నల్లటి కఠిన శిల (బసాల్ట్)పై చెక్కబడిన ఈ విగ్రహాలలో ఒకటి, ఉమాదేవి లలితాసనంలో శివుని ఒడిలో కూర్చుని ఉండగా, శివుడు జటాజూటధారితో, శాంత స్వరూపంతో దర్శనమిస్తున్నాడు.

శివుని చేతుల్లో డమరుకం, త్రిశూలం స్పష్టంగా కనిపిస్తున్నాయి. శిల్పకళలో శివ-పార్వతులకు ఆభరణాలు సున్నితంగా చెక్కబడి ఉండటం ఆ కాలపు శిల్పుల నైపుణ్యాన్ని తెలియజేస్తుంది. విగ్రహం అడుగుభాగంలో శివుని వాహనం నంది ప్రతిష్ఠితంగా ఉంది.

ఇదే గుహలో మరో ఉమామహేశ్వర విగ్రహం నంది వాహనంపై విరాజిల్లుతున్న దృశ్యం ప్రత్యేక ఆకర్షణగా నిలుస్తోంది. అటవీ ప్రాంతంలో ఉన్న సహజ రాతి గుహలో ఈ విగ్రహాలు వేల సంవత్సరాలుగా నిలిచి ఉండటం విశేషం.

ఉమామహేశ్వర స్వరూపం దాంపత్య సౌఖ్యం, కుటుంబ శాంతి, ఐక్యతకు ప్రతీకగా భావించబడుతుందని భక్తుల విశ్వాసం. ఈ క్షేత్ర పర్యటనలో డా. తుమ్మల దేవరావుతో పాటు అబ్బడి రాజేశ్వర్ రెడ్డి తదితరులు పాల్గొన్నారు.